Britaniyaning The Economist nashri versiyasi bo‘yicha Malavi (Janubiy Afrika) “avtoritar mintaqada demokratiyaning qayta tug‘ilishi” munosabati bilan yil mamlakatiga aylandi, deb xabar beradi “Gazeta.uz”.
Tahririyatning ma’lum qilishicha, koronavirus pandemiyasi boshlanidan buyon o‘nlab mamlakatlarda demokratiya va inson huquqlarini hurmat qilish darajasi tushib ketgan, biroq Malavi “vaziyat yaxshilangan yagona joyga” aylangan.
2019-yilning bahorida Malavi prezidentligiga o‘tkazilgan saylovlarda Piter Mutarika g‘olib chiqib, ikkinchi muddatga saylangan edi. “Ovozlarni sanash hisob varaqalaridagi tahrirlovchi suyuqlik sabab soxtalashtirilgan. Shunga qaramay, xorijlik kuzatuvchilar bunga beparvo bo‘lib, ma’qullagan”, — deyiladi xabarda.
Mamlakatda ommaviy norozilik namoyishlari boshlangan. Malavi Konstitutsiyaviy sudi saylovlar natijasini bekor qilgan. 2020-yilning iyun oyida qayta o‘tkazilgan saylovlarda Piter Mutarika mag‘lubiyatga uchrab, muxolifat nomzodi Lazarus Chakver mamlakat rahbariga aylangan.
Yil mamlakati nomiga da’vogarlik qilgan davlatlarning qisqa ro‘yxatidan Yangi Zelandiya (koronavirusga qarshi kurashdagi harakatlari uchun), Tayvan (koronavirusga qarshi qo‘llagan choralari, yuqori iqtisodiy ko‘rsatkichlari va Xitoy siyosatiga qarshi turgani uchun), AQSh (koronavirusga qarshi vaksinani rekord darajada tez muddatda yaratgani, Trampni qayta saylashmagani uchun) va Boliviya (sotsialist-prezident ag‘darilgani va yangi prezident saylangani uchun) o‘rin olgan.
Eslatib o‘tamiz, 2019-yilda O‘zbekiston Britaniyaning The Economist jurnali versiyasiga ko‘ra “Yil davlati”ga aylangan edi.
Izoh (0)