Belarus AESning birinchi bloki yana elektr tarmog‘iga ulandi

Belarusda BelAES ishga tushirilganidan buyon ikkinchi marta to‘xtatilgan atom elektr stansiyasining birinchi energoblokini ishga tushirish bosqichi yakunlandi, deb xabar bermoqda “Kommersant” mamlakat energetika vazirligiga tayanib. Uning tajribaviy-sanoat ekspluatatsiyasi yadro va radiatsiya xavfsizligi departamenti ruxsat berganidan keyin boshlanadi.

“Birinchi energoblokning turbogeneratori yana energiya tizimiga ulandi, u keyinchalik 500 MVt quvvatgacha chiqadi”, — deya o‘z Telegram kanalida ma’lum qildi Belarus energetika vazirligi. Ta’kidlanishicha, Bel AES energobloklarining har biri 1,2 GVt nominal quvvatga ega.

Idora qayd etishicha, tajribaviy-sanoat ekspluatatsiyasi chog‘ida reaktor qurilmasining quvvati 70 foizdan 90 foizgacha va 100 foizgacha oshiriladi. Nominal quvvatda energoblok 15 sutka davomida ishlaydi, shundan so‘ng komissiya uni ekspluatatsiyaga qabul qiladi.

BelAES 7-noyabr kuni Aleksandr Lukashenko tomonidan tantanali ravishda ochib berilgan. Ochilish marosimida Lukashenko Belarus qudratli yadro davlatiga aylanishini ma’lum qilgan.

9-noyabr kuni esa (ba’zi manbalarda 8-noyabr kuni) AESning birinchi energoblokida kuchlanish transformatorlarining ishdan chiqishi sababli turbina to‘xtatilgani haqida ma’lumot paydo bo‘ldi. Belarus Energetika vazirligining xabar berishicha, atom elektrostansiyasida “alohida elektrotexnik o‘lchov qurilmalarini almashtirish zarurati aniqlangan, mazkur qurilmani almashtirish ishlari esa texnologik reglamentga asosan amalga oshirilmoqda”. 10-noyabr kuni Belarus Davlat atom nazorati xizmati almashtirilishi kerak bo‘lgan elektrotexnik o‘lchov qurilmasi xavfsizlikning 4-sinfiga taalluqli ekanligi va obyektning yadroviy va radiatsion xavfsizligiga ta’sir qilmasligi haqida xabar berdi.

9-noyabrdan 19-noyabrgacha reactor transformator bilan bog‘liq muammolar tufayli reaktor to‘xtatib qo‘yilgan edi. Shundan keyin qurilma yangilandi va u ishlab ketdi, ammo dekabr boshida yana ish to‘xtatilgani haqida xabar berildi.

Belarusdagi birinchi atom elektr stansiyasining qurilishi 2011-yilning iyul oyida boshlangan. Uning qurilishi uchun Rossiyaning “VVER-1200” suv-suv reaktoriga ega “AES-2006” loyihasi tanlangan. Stansiya Belarusning shimoli-g‘arbiy chegarasida, Grodno viloyatining Ostrovets shahridan 18 kilometr uzoqlikdagi Vornyani shaharchasida — Litva poytaxti Vilnyusdan 40 kilometr uzoqlikda joylashgan. AESni qurish bo‘yicha Belarusning asosiy hamkori “Rosatom” davlat korporatsiyasining “Atomstroyeksport” kompaniyasi bo‘lgan.

BelAESning 7-noyabr kuni ishga tushirilgan birinchi energobloki mamlakatning birlashgan energiya tizimiga 3-noyabr kuni ulangan. Energiya tizimiga ulanganidan boshlab uch sutka davomida BelAESdan 22 million kilovatt/soat elektr energiyasi chiqarilgan.