The Economist Малавини йил мамлакати деб топди

Британиянинг The Economist нашри версияси бўйича Малави (Жанубий Африка) «авторитар минтақада демократиянинг қайта туғилиши» муносабати билан йил мамлакатига айланди, деб хабар беради «Gazeta.uz».

Таҳририятнинг маълум қилишича, коронавирус пандемияси бошланидан буён ўнлаб мамлакатларда демократия ва инсон ҳуқуқларини ҳурмат қилиш даражаси тушиб кетган, бироқ Малави «вазият яхшиланган ягона жойга» айланган.

2019 йилнинг баҳорида Малави президентлигига ўтказилган сайловларда Питер Мутарика ғолиб чиқиб, иккинчи муддатга сайланган эди. «Овозларни санаш ҳисоб варақаларидаги таҳрирловчи суюқлик сабаб сохталаштирилган. Шунга қарамай, хорижлик кузатувчилар бунга бепарво бўлиб, маъқуллаган», — дейилади хабарда.

Мамлакатда оммавий норозилик намойишлари бошланган. Малави Конституциявий суди сайловлар натижасини бекор қилган. 2020 йилнинг июнь ойида қайта ўтказилган сайловларда Питер Мутарика мағлубиятга учраб, мухолифат номзоди Лазарус Чаквер мамлакат раҳбарига айланган.

Йил мамлакати номига даъвогарлик қилган давлатларнинг қисқа рўйхатидан Янги Зеландия (коронавирусга қарши курашдаги ҳаракатлари учун), Тайвань (коронавирусга қарши қўллаган чоралари, юқори иқтисодий кўрсаткичлари ва Хитой сиёсатига қарши тургани учун), АҚШ (коронавирусга қарши вакцинани рекорд даражада тез муддатда яратгани, Трампни қайта сайлашмагани учун) ва Боливия (социалист-президент ағдарилгани ва янги президент сайлангани учун) ўрин олган.

Эслатиб ўтамиз, 2019 йилда Ўзбекистон Британиянинг The Economist журнали версиясига кўра «Йил давлати»га айланган эди.