Turkiya mehmonxonalarida Yangi yil munosabati bilan ko‘ngilochar dasturlarni o‘tkazish taqiqlandi, deb yozadi “RBK” Turkiya ichki ishlar vazirligining mehmonxonalarda sayyohlar uchun Yangi yil bayramini o‘tkazish tartibi to‘g‘risidagi xabariga tayanib.
Idorada ta’kidlashlaricha, yaqinda ba’zi mehmonxonalar koronavirusga qarshi kurash doirasida qabul qilingan va bunday tadbirlarni o‘tkazishni taqiqlaydigan choralarga qaramasdan, taomlar va musiqiy ko‘ngilochar dasturlarni o‘z ichiga olgan Yangi yil paketlarini reklama qilgan va sotuvga qo‘ygan.
Shu munosabat bilan xabarda quyidagi holatlar alohida qayd etiladi:
- Mehmonxonalarda va ularning restoranlarida Yangi yilni nishonlash taqiqlanadi. Gap ballar, boshlovchilar va musiqachilarni o‘z ichiga olgan ko‘ngilochar dasturlar, bazmlar, shoular va gala-ziyofatlar haqida bormoqda.
- Bunday tadbirlarni reklama qilish va Yangi yil tadbirlarini o‘z ichiga oluvchi turlarni sotish taqiqlanadi.
- Musiqa va raqslardan iborat har qanday ko‘ngilochar dastur taqiqlanadi (22:00 ga qadar ham), 22:00 dan keyin mehmonxonalarda musiqa yangramasligi kerak, shu jumladan, restoranlarda, yashash xonalarida va boshqa zallarda ham.
- Mehmonxonalarda va ularning restoranlarida odamlar to‘planishi taqiqlanadi.
Dam olish kunlari komendantlik soati e’lon qilinganidan keyin Turkiya IIV bu choralar sayyohlar uchun amal qilmasligini bildirdi.
1-dekabrdan esa Turkiya hukumati mehmonxonalardagi restoranlarning ishlash qoidalarini qat’iylashtirdi. O‘shanda mamlakat IIV mehmonxona majmualarida joylashgan kafe va restoranlar faqat shu mehmonxona mijozlariga xizmat ko‘rsatishi mumkinligini aytib, uyga olib ketish uchun taomlar sotishni taqiqlab qo‘ygandi. Bundan tashqari, restoranlarda va har qanday konsert binolarida 22:00 dan keyin hech qanday musiqiy tadbirlar o‘tkazilishi mumkin emas, deb belgilandi.
Rossiya sayyohlik agentliklari alyansi ijrochi direktori Nataliya Osipova bu cheklovlarni izohlar ekan, kiritilgan choralarning aksariyati Rossiyadan tashkil qilingan turlarga tegishli emasligini aytdi va buni turagentdan aniqlashtirishni tavsiya qildi.
14-dekabr kuni Turkiya prezidenti Rajab Toyyib Erdo‘g‘on Yangi yil bayramlari davrida — 31-dekabr kuni soat 21:00 dan 4-yanvar soat 05:00 ga qadar mamlakatda komendantlik soati amal qilishini e’lon qildi. “Biz avvalroq ko‘rgan chora-tadbirlar sharofati bilan COVID-19’ga aloqador bemorlar va o‘limlar soni boshqa mamlakatlardagiga nisbatan jiddiy ravishda pasayayotganini kuzatyapmiz”, — dedi Erdo‘g‘on.
Izoh (0)