“Rosselxoznadzor” O‘zbekistonda ishlab chiqarilgan tayyor go‘sht va sut mahsulotlari eksporti uchun qo‘yilgan vaqtinchalik taqiqni bekor qildi

O‘zbekistonda ishlab chiqilgan chorvachilik mahsulotlari, xususan, termik ishlovdan o‘tgan tayyor go‘sht va sut mahsulotlari hamda xomashyolarining Rossiyaga eksporti uchun yo‘l ochildi. Bu haqda Veterinariya va chorvachilikni rivojlantirish davlat qo‘mitasiga tayanib “Kun.uz” xabar berdi.

Ma’lum qilinishicha, “Rosselxoznadzor” federal xizmati tomonidan qo‘yilgan vaqtinchalik cheklov Xalqaro epizootik byuroning Quruqlikdagi hayvonlar sog‘lig‘i kodeksi talablari asosida termik ishlovdan o‘tgan tayyor mahsulotlar uchun bekor qilingan.

Endilikda O‘zbekistonda tayyor go‘sht va sut mahsulotlarini ishlab chiqaruvchi tadbirkorlik subyektlari o‘z mahsulotlarini Rossiya bozorida sotishi mumkin.

“Buning uchun tadbirkorlik subyektlari Yevrosiyo iqtisodiy ittifoqiga a’zo davlatlarga eksport qiluvchi korxonalarni yagona reyestriga kirishi kerak. Reyestrga kiritishdan oldin a’zo davlatlarning vakolatli organlari tomonidan hamkorlikda ishlab chiqaruvchi korxonalarda belgilangan tartibda veterinariya audit va inspeksiya o‘rganishlari o‘tkazilishi zarur bo‘ladi”, — deyiladi xabarda.

Dastlabki bosqichda mamlakatda faoliyat olib borayotgan hamda o‘z mahsulotlarini eksport qilish istagini bildirgan go‘sht, sut mahsulotlari, baliq, parranda mahsulotlarini ishlab chiqaruvchi 9 ta korxonada mahsulotlarni Yevrosiyo iqtisodiy ittifoqiga a’zo mamlakatlarga eksport qilishni amalga oshirish maqsadida vakolatli organlar tomonidan veterinariya audit va inspeksiya o‘rganishlarining o‘tkazilishi tashkil etilgan.

Eslatib o‘tamiz, jigarrang burishgan virusi aniqlangani sababli “Rosselxoznadzor” 26-noyabrdan boshlab Farg‘ona viloyatidan Rossiyaga pomidor va qalampir olib kirishni taqiqlagan edi. Keyinroq quritilgan o‘rik partiyasida ham xavfli zararkunanda (kapr qo‘ng‘izi) aniqlangach, “Rosselxoznadzor” Farg‘onadan barcha turdagi o‘simlik mahsulotlari importini taqiqladi. Rossiya tomoni shu kabi taqiqlarni so‘nggi ikki hafta ichida Navoiy va Qashqadaryo viloyatida yetishtirilgan mahsulotlarga ham joriy etgan. Keyinroq “Rosselxoznadzor” Rossiyaga Farg‘onadagi yettita korxonadan pomidor va qalampir olib kirishga ruxsat bergandi.