Ўзбекистонда ишлаб чиқилган чорвачилик маҳсулотлари, хусусан, термик ишловдан ўтган тайёр гўшт ва сут маҳсулотлари ҳамда хом ашёларининг Россияга экспорти учун йўл очилди. Бу ҳақда Ветеринария ва чорвачиликни ривожлантириш давлат қўмитасига таяниб «Kun.uz» хабар берди.
Маълум қилинишича, «Росселхознадзор» федерал хизмати томонидан қўйилган вақтинчалик чеклов Халқаро эпизоотик бюронинг Қуруқликдаги ҳайвонлар соғлиғи кодекси талаблари асосида термик ишловдан ўтган тайёр маҳсулотлар учун бекор қилинган.
Эндиликда Ўзбекистонда тайёр гўшт ва сут маҳсулотларини ишлаб чиқарувчи тадбиркорлик субъектлари ўз маҳсулотларини Россия бозорида сотиши мумкин.
«Бунинг учун тадбиркорлик субъектлари Евросиё иқтисодий иттифоқига аъзо давлатларга экспорт қилувчи корхоналарни ягона реестрига кириши керак. Реестрга киритишдан олдин аъзо давлатларнинг ваколатли органлари томонидан ҳамкорликда ишлаб чиқарувчи корхоналарда белгиланган тартибда ветеринария аудит ва инспекция ўрганишлари ўтказилиши зарур бўлади», — дейилади хабарда.
Дастлабки босқичда мамлакатда фаолият олиб бораётган ҳамда ўз маҳсулотларини экспорт қилиш истагини билдирган гўшт, сут маҳсулотлари, балиқ, парранда маҳсулотларини ишлаб чиқарувчи 9 та корхонада маҳсулотларни Евросиё иқтисодий иттифоқига аъзо мамлакатларга экспорт қилишни амалга ошириш мақсадида ваколатли органлар томонидан ветеринария аудит ва инспекция ўрганишларининг ўтказилиши ташкил этилган.
Мавзуга доир: ДБҚ расмийси Россия томонидан Ўзбекистоннинг айрим қишлоқ хўжалиги маҳсулотларига тақиқ қўйилаётганига муносабат билдирди
Изоҳ (0)