“Barselona” hujumchisi Lionel Messi La Liga doirasida “Valensiya”ga qarshi o‘tkazilgan 19-dekabr kungi bellashuvda (2:2) penaltidan gol ura olmadi.
Natijada argentinalik futbolchi La Liga tarixida amalga oshirilmagan penaltilar soni bo‘yicha 2-o‘ringa ko‘tarildi. Messi hozirga qadar 13 marta penaltidan gol ura olmagan. Bu orqali Leo “Sporting Xixon” va “Barselona” sobiq hujumchisi Kiniga tenglashib oldi.
Bu ko‘rsatkich bo‘yicha La Liga tarixida 1-o‘rinda “Atletiko” va “Real” sobiq forvardi Ugo Sanches bormoqda — 15 ta foydalanilmagan penalti. 3-pog‘onani esa “Espanyol”, “Real Sosyedad”, “Rayo Valyekano” sobiq a’zosi Raul Tamudo band etgan — 12 ta amalga oshirilmagan penalti.
“Real” sobiq hujumchisi Krishtianu Ronaldu La Ligada 11 ta penaltini golga aylantira olmagan.
Qayd etish joiz, Messi “Valensiya”ga qarshi bahsdagi penalti orqali La Ligadagi penaltilar soni bo‘yicha Ronaldu bilan tenglashdi. Endi ikkala futbolchining hisobida ham 72 ta penalti zarbasi mavjud.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)