Toshkent shahar hokimligi 2021-yilning birinchi choragida yevroobligatsiyalar chiqarishni rejalashtirmoqda. Bu haqda poytaxt hokimining o‘rinbosari — investitsiyalar va tashqi savdo boshqarmasi boshlig‘i Sharof Rahmonov 19-dekabr kuni bo‘lib o‘tgan matbuot anjumanida ma’lum qildi, deb xabar bermoqda “Gazeta.uz”. Xalqaro qarz bozoriga chiqish rejasi haqida avvalroq Toshkent shahar hokimi Jahongir Ortiqxo‘jaev aytgandi.
Uning so‘zlariga ko‘ra, umumiy qiymati 500 million dollarga teng ikki turdagi yevroobligatsiya transhi, ya’ni dollar va so‘mda joylashtirish kutilmoqda, shundan 200 million dollari milliy valyutada denominatsiyalanadi.
“Biz muayyan yo‘lni bosib o‘tdik. Yil davomida ishlab, shahar reytingini oldik, va hozirda uni yangiladik. Fitch Ratings reytingi ijobiy prognoz bilan “BB-”ni tasdiqladi. Hozir biz Standard & Poor's (S&P) (reyting agentligi) bilan ishlayapmiz, ikkinchi reytingni olishimiz kerak”, — degan hokim o'rinbosari.
Sharof Rahmonov ma’muriyat jalb etiladigan mablag‘lardan foydalanish bo‘yicha “muayyan hisob-kitoblarni” amalga oshirganligini bildirgan.
“Asosan, resurslar jalb qilinganida ular ijtimoiy loyihalarga yo‘naltiriladi. Ushbu mablag‘larning qaytarilishi odatda budjet mablag‘lari hisobiga, budjetni ortig‘i bilan to‘ldirish va boshqalar hisobiga amalga oshiriladi. Ammo ushbu holatda shaharda amalga oshiriladigan xalqaro kompaniyalar bilan tijoriy loyihalarni tayyorladik. Ushbu tijoriy loyihalardan foyda olish orqali biz obligatsiyalar va foiz marjasini qaytarishni rejalashtiryapmiz. Prognozlarimizga ko‘ra, bu taxminan 4 foizni tashkil qiladi”, — degan u.
Hokim o‘rinbosarining aytishicha, hokimiyat loyihalar ro‘yxatini yevroobligatsiya chiqarilgandan so‘ng oshkor qilishi mumkin, chunki ular “muayyan majburiyatlarni o‘z zimmasiga olgan”.
“Shuni aytish joizki, ushbu loyihalar tijorat maqsadlarda bo‘lishiga qaramay, biz fuqarolar uchun zarur yashash sharoitlarini, yangi ish o‘rinlarini yaratamiz. Va tabiiyki, boshqa jahon poytaxtlarida bo‘lgani kabi biz ham asosiy e’tiborni xizmat ko‘rsatish sohasini rivojlantirishga qaratamiz”, — deb ta’kidlagan u.
Sharof Rahmonovning ta’kidlashicha, yevroobligatsiyalarni joylashtirishdan tushadigan mablag‘larning bir qismi ijtimoiy sohaga yo‘naltiriladi. Avvalroq Toshkent hokimi Jahongir Ortiqxo‘jaev tibbiyot muassasalariga 100 million dollar ajratishni taklif qilgandi.
Uning qayd etishicha, joylashtirish London fond birjasida amalga oshiriladi.
Budjet qonunchiligiga binoan (142-modda) O‘zbekistonning shahar va viloyatlari ichki yoki tashqi bozorda qarz mablag‘larini jalb qilish huquqiga ega emas. Shu bilan birga, Prezident farmoni bilan Toshkentga ichki obligatsiyalarni chiqarish bo‘yicha eksklyuziv huquq berildi (yevroobligatsiyalar tashqi bozorga chiqishni ta’minlaydi), ya’ni poytaxt hokimi o‘zini qoplaydigan investitsion loyihalari uchun aholining foydalanilmayotgan mablag‘larini poytaxt obligatsiyalari yoki tashkil etiladigan tadbirkorlik subyektlari aksiyalari ko‘rinishidagi qimmatli qog‘ozlarni chiqarish yo‘li bilan jalb qilishi mumkin.
Kapital bozorini rivojlantirish agentligi boshqarma boshlig‘i Sherzod Egamberdiyev Toshkent shahar hokimligining yevroobligatsiya chiqarishga huquqiy asosi borligini bildirgan.
Izoh (0)