Toshkentdagi Sergeli tumanini issiqlik energiyasi bilan ta’minlovchi “Toshissiqquvati” DUKga qarashli “Sanoat Energiya” qozonxonasida yirik miqdordagi tabiiy gaz o‘g‘irlangani yuzasidan jinoyat ishi qo‘zg‘atildi, deb xabar bermoqda “Gazeta.uz”, Bosh prokuratura matbuot xizmatiga tayanib.
Eslatib o‘tamiz, dekabr oyi boshlarida qozonxona rahbari qozonxona hududidagi binoda tabiiy gazdan noqonuniy ravishda foydalangan holda ohak ishlab chiqarish faoliyatini yo‘lga qo‘ygani haqida xabar berilgandi.
Energetika vazirligi ushbu obyektda tabiiy gazni noqonuniy iste’mol qilish hajmi 571,3 ming kub metrni hamda ushbu noqonuniy xatti-harakatlar natijasida gaz ta’minoti tashkilotlariga yetkazilgan zarar, dastlabki hisob-kitoblarga ko‘ra, 571,3 million so‘mdan ziyodni tashkil etganini ma’lum qilgan.
Holat yuzasidan Toshkent shahar prokuraturasi 16-dekabr kuni Jinoyat kodeksining 205-moddasi 2-qismi bilan (juda ko‘p miqdorda zarar yetkazgan holda hokimiyat yoki mansab vakolatini suiiste’mol qilish) jinoyat ishi qo‘zg‘atgan. Ayni paytda Sergeli tuman prokuraturasi dastlabki tergov harakatlarini olib bormoqda.
Izoh (0)