Тошкент шаҳар ҳокимлиги 2021 йилнинг биринчи чорагида еврооблигациялар чиқаришни режалаштирмоқда. Бу ҳақда пойтахт ҳокимининг ўринбосари — инвестициялар ва ташқи савдо бошқармаси бошлиғи Шароф Раҳмонов 19 декабрь куни бўлиб ўтган матбуот анжуманида маълум қилди, деб хабар бермоқда «Gazeta.uz». Халқаро қарз бозорига чиқиш режаси ҳақида аввалроқ Тошкент шаҳар ҳокими Жаҳонгир Ортиқхўжаэв айтганди.
Унинг сўзларига кўра, умумий қиймати 500 миллион долларга тенг икки турдаги еврооблигация транши, яъни доллар ва сўмда жойлаштириш кутилмоқда, шундан 200 миллион доллари миллий валютада деноминацияланади.
«Биз муайян йўлни босиб ўтдик. Йил давомида ишлаб, шаҳар рейтингини олдик, ва ҳозирда уни янгиладик. Fitch Ratings рейтинги ижобий прогноз билан «BB-»ни тасдиқлади. Ҳозир биз Standard& Poor’s(S&P) (reyting agentligi) билан ишлаяпмиз, иккинчи рейтингни олишимиз керак», — деган ҳоким ўринбосари.
Шароф Раҳмонов маъмурият жалб этиладиган маблағлардан фойдаланиш бўйича «муайян ҳисоб-китобларни» амалга оширганлигини билдирган.
«Асосан, ресурслар жалб қилинганида улар ижтимоий лойиҳаларга йўналтирилади. Ушбу маблағларнинг қайтарилиши одатда бюджет маблағлари ҳисобига, бюджетни ортиғи билан тўлдириш ва бошқалар ҳисобига амалга оширилади. Аммо ушбу ҳолатда шаҳарда амалга ошириладиган халқаро компаниялар билан тижорий лойиҳаларни тайёрладик. Ушбу тижорий лойиҳалардан фойда олиш орқали биз облигациялар ва фоиз маржасини қайтаришни режалаштиряпмиз. Прогнозларимизга кўра, бу тахминан 4 фоизни ташкил қилади», — деган у.
Ҳоким ўринбосарининг айтишича, ҳокимият лойиҳалар рўйхатини еврооблигация чиқарилгандан сўнг ошкор қилиши мумкин, чунки улар «муайян мажбуриятларни ўз зиммасига олган».
«Шуни айтиш жоизки, ушбу лойиҳалар тижорат мақсадларда бўлишига қарамай, биз фуқаролар учун зарур яшаш шароитларини, янги иш ўринларини яратамиз. Ва табиийки, бошқа жаҳон пойтахтларида бўлгани каби биз ҳам асосий эътиборни хизмат кўрсатиш соҳасини ривожлантиришга қаратамиз», — деб таъкидлаган у.
Шароф Раҳмоновнинг таъкидлашича, еврооблигацияларни жойлаштиришдан тушадиган маблағларнинг бир қисми ижтимоий соҳага йўналтирилади. Аввалроқ Тошкент ҳокими Жаҳонгир Ортиқхўжаэв тиббиёт муассасаларига 100 миллион доллар ажратишни таклиф қилганди.
Унинг қайд этишича, жойлаштириш Лондон фонд биржасида амалга оширилади.
Бюджет қонунчилигига биноан (142-модда) Ўзбекистоннинг шаҳар ва вилоятлари ички ёки ташқи бозорда қарз маблағларини жалб қилиш ҳуқуқига эга эмас. Шу билан бирга, Президент фармони билан Тошкентга ички облигацияларни чиқариш бўйича эксклюзив ҳуқуқ берилди (еврооблигациялар ташқи бозорга чиқишни таъминлайди), яъни пойтахт ҳокими ўзини қоплайдиган инвестицион лойиҳалари учун аҳолининг фойдаланилмаётган маблағларини пойтахт облигациялари ёки ташкил этиладиган тадбиркорлик субъектлари акциялари кўринишидаги қимматли қоғозларни чиқариш йўли билан жалб қилиши мумкин.
Капитал бозорини ривожлантириш агентлиги бошқарма бошлиғи Шерзод Эгамбердиев Тошкент шаҳар ҳокимлигининг еврооблигация чиқаришга ҳуқуқий асоси борлигини билдирган.
Изоҳ (0)