Samarqand viloyati aholisining tabiiy gazdan qarzdorligi 785 milliard so‘mni tashkil etadi. Qarzdorlik yil boshiga nisbatan 163,3 milliard so‘mga oshgan. Bu haqda xalq deputatlari Samarqand viloyati Kengashining o‘n to‘qqizinchi sessiyasida viloyat hokimi Erkinjon Turdimov ma’lum qildi, deya xabar berdi “Daryo” muxbiri.

Viloyat hokimining ma’lum qilishicha, viloyatda eng katta qarzdorlik Samarqand shahri hisobiga to‘g‘ri kelib, hozirda shahar aholisining gazdan qarzdorligi 313,9 milliard so‘mni tashkil qiladi. Shuningdek, Pastdarg‘om tumanida 118,7 milliard, Samarqand tumanida esa 72,4 milliard so‘mlik qarzdorlik mavjud.

“Bugun viloyatda tabiiy va suyultirilgan gaz tanqisligi sezilmoqda. Viloyat aholisi uchun bir oylik tabiiy gaz talabga nisbatan 34 million 307 ming kub kam yetkazilmoqda. Bu esa o‘z navbatida Samarqand shahri, Payariq, Urgut, Pastdarg‘om va Samarqand tumanlarida ko‘proq sezilmoqda”, — deydi viloyat hokimi Erkinjon Turdimov.

Samarqand viloyatida bugungi kunda 744 ta mahalladagi 442 ming aholi suyultirilgan gaz bilan ta’minlanmoqda.

2020-yilda 25 milliard so‘mlik gaz tarmoqlari rekonstruksiya qilingan. Ayniqsa, Oqdaryo GRSdan O‘zbektrakt, Shohizinda, A.Shomurodov ko‘chalari orqali Penjikent ko‘chasigacha diametri 325 mmetrli 11,5 km yuqori bosimli gaz quvurlarida qurilish-montaj ishlari olib borilgan. Ro‘dakiy va Bo‘stansaroy ko‘chalarida diametri 530 mmetrli (0,8 km) yer osti gaz quvurlari yangilangan.