Namanganda Hyundai avtozavodi qurilishi bo‘yicha O‘zbekiston tomoni barcha majburiyatlarini bajargan. Bu haqda viloyat hokimi Shavkatjon Abdurazzaqov xalq deputatlari Namangan viloyat Kengashi sessiyasidagi murojaatidan so‘ng o‘tkazilgan matbuot anjumanida ma’lum qildi, deya xabar beradi “Daryo” muxbiri Azizbek Abduvaliyev.
Jumladan, “Namangan” erkin iqtisodiy zonasi hududidan joy ajratilgan, hamkorlik shartnomalari imzolangan. Biroq Janubiy Koreya tomoni ta’sischilari (jami uchta) tarkibi hamda mazkur kompaniyalar bozori geografiyasidagi o‘zgarishlar tufayli loyiha vaqtincha to‘xtab qolgan.
“Hokim sifatida ish boshlaganimga uch oy to‘lgan bo‘lsa, shu masalada ikki marotaba muzokaralar o‘tkazdik. Koreya tomonidan boshqa ta’sischi qo‘shilgan yangi shartnoma taklif etildi. Qo‘shimcha investitsiyalar kiritish, korxonani rivojlantirish bo‘yicha. Uni ham imzoladik. Endi Koreya tomoni shartnomani imzolashi kerak. Maqsadimiz loyihani o‘z holiga tashlab qo‘yish emas, balki yurgizish, oxiriga yetkazish. Bir oy muddatimiz bor, javobini kutyapmiz”, — dedi Shavkatjon Abdurazzaqov.
Eslatib o‘tamiz, Namanganda Hyundai avtomobillari ishlab chiqarish loyihasini amalga oshirish bo‘yicha investitsion shartnoma 2018-yil noyabrida imzolangan, 2019-yil sentabrida zavod ilk mahsulotlarini taqdim etishi ko‘zda tutilgandi. Avtozavodda yiliga 2,5 mingta kichik yuk mashinasi, mikroavtobus hamda avtobus ishlab chiqarilishi rejalashtirilgan.
Izoh (0)