Bandlik va mehnat munosabatlari vazirligi Nukusda jamoat ishlari uchun ish haqi ololmagan ayollar avtomobil yo‘lini to‘sib qo‘ygani to‘g‘risidagi holatga munosabat bildirdi.
Eslatib o‘tamiz, 17-dekabr kuni ijtimoiy tarmoqlarda Qoraqalpog‘istonning Nukus shahri markaziy ko‘chalaridan birida ayollar yozda karantin paytida jamoat ishlari uchun ish haqi to‘lanmaganligi sababli yo‘lni to‘sib qo‘ygani tasvirlangan video tarqalgandi.
Ayollar A.Do‘snazarov va M.Jumanazarov ko‘chalari kesishmasidagi shaharning markaziy chorrahalardan biriga borgan va shahar Bandlikka ko‘maklashish markazi ro‘parasida turib olgan. Keyinroq ularni shahar hokimiyati qabul qilgan.
Ta’kidlanishicha, mazkur holat bo‘yicha Bandlik va mehnat munosabatlari vazirligi tomonidan tezkor o‘rganish o‘tkazilgan.
Ma’lumotlarga ko‘ra, 2020-yilning noyabr oyida “temir daftar”ga, “ayollar daftari”ga kiritilgan kambag‘al oilalarning mehnatga layoqatli a’zolarining bandligiga ko‘maklashish maqsadida Nukus shahrida 1184 nafar ishsiz fuqaro qo‘shimcha ravishda mahalla fuqarolari yig‘inlari buyurtmasiga asosan jamoat ishlariga jalb etilgan va ularga 817 million so‘m ish haqi hisoblangan.
Amaldagi tartibga muvofiq, buyurtmachi — ish beruvchi tomonidan jamoat ishlarida bajarilgan ish hajmi to‘g‘risida dalolatnoma, jamoat ishiga qatnashganligini tasdiqlovchi qaydnoma (tabel) taqdim etilganidan so‘ng mazkur hujjatlar aholi bandligiga ko‘maklashish markazi tomonidan ko‘rib chiqilib, Jamoat ishlari jamg‘armasidan qo‘shimcha mablag‘lari moliyalashtirilib beriladi.
“Hozirgi kunga kadar fuqarolarga 226 million so‘m ish haqi to‘lab berildi, qolgan 591 million so‘m mablag‘ Nukus shahar aholi bandligiga ko‘maklashish markazi tomonidan 18-dekabr kuni to‘liq to‘lab beriladi”, — deyiladi xabarda.
O‘rganish yakuni bilan aybdor shaxslarga nisbatan intizomiy choralar ko‘rilishi ta’kidlangan. Mablag‘lar to‘liq to‘lab berilgani va aybdor mansabdor shasxlarga choralar ko‘rilganligi to‘g‘risida ma’lumot qo‘shimcha taqdim etilishi ma’lum qilingan.
Avvalroq gaz va elektr ta’minotidagi uzilishlar sabab Buxoro va Andijon viloyatlarida aholi avtomobil yo‘llarini to‘sib qo‘ygani haqida xabar berilgan edi.
Izoh (0)