Бандлик ва меҳнат муносабатлари вазирлиги Нукусда жамоат ишлари учун иш ҳақи ололмаган аёллар автомобиль йўлини тўсиб қўйгани тўғрисидаги ҳолатга муносабат билдирди.
Эслатиб ўтамиз, 17 декабрь куни ижтимоий тармоқларда Қорақалпоғистоннинг Нукус шаҳри марказий кўчаларидан бирида аёллар ёзда карантин пайтида жамоат ишлари учун иш ҳақи тўланмаганлиги сабабли йўлни тўсиб қўйгани тасвирланган видео тарқалганди.
Аёллар А.Дўсназаров ва М.Жуманазаров кўчалари кесишмасидаги шаҳарнинг марказий чорраҳалардан бирига борган ва шаҳар Бандликка кўмаклашиш маркази рўпарасида туриб олган. Кейинроқ уларни шаҳар ҳокимияти қабул қилган.
Таъкидланишича, мазкур ҳолат бўйича Бандлик ва меҳнат муносабатлари вазирлиги томонидан тезкор ўрганиш ўтказилган.
Маълумотларга кўра, 2020 йилнинг ноябрь ойида «темир дафтар»га, «аёллар дафтари»га киритилган камбағал оилаларнинг меҳнатга лаёқатли аъзоларининг бандлигига кўмаклашиш мақсадида Нукус шаҳрида 1184 нафар ишсиз фуқаро қўшимча равишда маҳалла фуқаролари йиғинлари буюртмасига асосан жамоат ишларига жалб этилган ва уларга 817 миллион сўм иш ҳақи ҳисобланган.
Амалдаги тартибга мувофиқ, буюртмачи — иш берувчи томонидан жамоат ишларида бажарилган иш ҳажми тўғрисида далолатнома, жамоат ишига қатнашганлигини тасдиқловчи қайднома (табел) тақдим этилганидан сўнг мазкур ҳужжатлар аҳоли бандлигига кўмаклашиш маркази томонидан кўриб чиқилиб, Жамоат ишлари жамғармасидан қўшимча маблағлари молиялаштирилиб берилади.
«Ҳозирги кунга кадар фуқароларга 226 миллион сўм иш ҳақи тўлаб берилди, қолган 591 миллион сўм маблағ Нукус шаҳар аҳоли бандлигига кўмаклашиш маркази томонидан 18 декабрь куни тўлиқ тўлаб берилади», — дейилади хабарда.
Ўрганиш якуни билан айбдор шахсларга нисбатан интизомий чоралар кўрилиши таъкидланган. Маблағлар тўлиқ тўлаб берилгани ва айбдор мансабдор шасхларга чоралар кўрилганлиги тўғрисида маълумот қўшимча тақдим этилиши маълум қилинган.
Аввалроқ газ ва электр таъминотидаги узилишлар сабаб Бухоро ва Андижон вилоятларида аҳоли автомобиль йўлларини тўсиб қўйгани ҳақида хабар берилган эди.
Изоҳ (0)