Toshkent shahrida barpo etilayotgan yerusti metro halqa yo‘li “O‘zbekiston mustaqilligining o‘ttiz yilligi” deb nomlanadi. Bu Prezidentning “O‘zbekiston davlat mustaqilligining o‘ttiz yillik bayramiga tayyorgarlik ko‘rish va uni yuqori saviyada o‘tkazish to‘g‘risida”gi qarorida belgilangan.
Qarorga ko‘ra, O‘zbekiston davlat mustaqilligining o‘ttiz yillik bayramiga tayyorgarlik ko‘rish va uni yuqori saviyada o‘tkazish bo‘yicha respublika komissiyasi tashkil qilinadi.
Shuningdek, Toshkentda “Istiqlol” majmuasi tashkil etilib, u yerda mustaqillikning mazmun-mohiyati va tarixiy ahamiyatini aks ettiradigan yodgorlik kompozitsiyasi barpo etiladi.
Shu bilan birga, O‘zbekistonning yangi taraqqiyot davri va rivojlanish istiqbollari mavzusida xalqaro ilmiy-amaliy konferensiya tashkil etiladi. O‘tgan davrda erishilgan yutuqlarga bag‘ishlangan “Yangi O‘zbekiston” kitob-albomi va to‘plamlar nashr qilinadi.
Bundan tashqari qarorda quyidagilar belgilangan:
- 2021-yilda mamlakatda o‘tkazilishi rejalashtirilgan barcha xalqaro madaniy-ma’rifiy tadbirlar, sport musobaqalari, ilmiy konferensiyalar, ajdodlar yubiley sanalarini mustaqillikning o‘ttiz yilligi g‘oyasi va ruhi bilan uyg‘un va hamohang holda tashkil etish;
- madaniyat va san’atning barcha yo‘nalishlari (musiqa, teatr, kino, tasviriy va amaliy san’at, sirk, xalq ijodiyoti) bo‘yicha respublika miqyosida festival va ko‘rgazmalarni tashkil etish;
- O‘zbekiston mustaqilligini tarannum etadigan eng yaxshi qo‘shiq va musiqa asarlari hamda tarixiy va zamonamiz qahramonlari hayoti va faoliyati haqidagi pyesalar tanlovlarini tashkil etish;
- mustaqillik yillarida erishilgan ilmiy yutuqlar asosida yaratilgan innovatsion loyiha va texnologiyalar ko‘rgazmalarini o‘tkazish haqidagi takliflarni ma’qullash.
Izoh (0)