Toshkentda shahar hokimligi tomonidan Yoshlar ishlari agentligi va O‘zbekiston Yoshlar ittifoqi bilan hamkorlikda o‘tkaziladigan Yoshlar forumi uchun qancha xarajat qilinishi hozircha aniq emas. Bu haqda 18-dekabr kuni forumning ochilishiga bag‘ishlangan matbuot anjumanida Toshkent shahar hokimi Jahongir Ortiqxo‘jayev ma’lum qildi, deya xabar bermoqda “Daryo” muxbiri.
Toshkent Yoshlar forumi doirasida ikki kun vazirlik va idoralarning rahbarlari, blogerlar, TikTok va Instagram yulduzlari bilan uchrashuvlar ochiq muloqotlar tashkil etilishi ko‘zda tutilgan. Shuningdek, hokim Jahongir Ortiqxo‘jayevning alohida taqdimoti rejalashtirilgan. Forumning uchinchi kunida “ko‘cha sporti” musobaqasining respublika bosqichi o‘tkazilishi rejalashtirilgan. Forum 21-dekabr Humo Arena’dagi gala-konsert bilan yopiladi.
Jahongir Ortiqxo‘jayevning ma’lum qilishicha, “bir oylik tadbirlar uchun sovg‘alar berish, turli yutuqlarni qo‘yishga mahalliy budjet hisobidan 2 milliard so‘m ajratganmiz”. “Bu forum uchun jami xarajatning 30 foizini tashkil qiladi. Bundan tashqari, bir qancha homiylarni ham bu ishga jalb qilganmiz. Umumiy xarajat hozircha aniq emas. Chunki homiylar tomonidan ko‘p yordam berildi va hali ham davom etyapti”, — dedi poytaxt hokimi.
Shahar hokimi o‘rinbosari Durdona Rahimovaning so‘zlariga ko‘ra, hozirga qadar Yoshlar oyligi doirasida qatnashgan 347 ming nafar yigit-qizlardan 7 ming nafari rag‘batlantirilgan. Ularga o‘z sohasida kerak bo‘ladigan anjomlar, sport va musiqa inventarlari, imkoniyati cheklangan yoshlarga zarur uskunalar taqdim etilgan.
“Mahalliy budjet uchun pulni, shunchaki o‘zimiz qaror chiqarib emas, mahalliy kengash deputatlari oldida himoya qilgandan keyin olamiz. Har bir olinadigan sovg‘a, har bir xarajatni ularga taqdimot qilib, isbotlab tushuntirib, keyin olamiz. Bugungi kunda jamoatchilik nazorati kuchayib bormoqda. Ertaga baribir bu xarajatlarimiz ijtimoiy tarmoqlarda o‘z aksini topadi. Biz bu xarajatlar nima uchun ishlatilganini ipidan ignasigacha tushuntirib berishga tayyormiz”, — dedi Rahimova xonim.
Izoh (0)