O‘zbekiston oliy ta’lim muassasalari talabalar va xodimlari uchun koronavirusga qarshi dorilarni Dori-Darmon aksiyadorlik kompaniyasidan sotib olishi to‘g‘risida xabar berilgandi. Monopoliyaga qarshi kurashish qo‘mitasi ikki vazirlik rahbarlarining qo‘shma qarori yuzasidan o‘rganish ishlarini olib borib, o‘z xulosasini taqdim etdi.
Sog‘liqni saqlash vaziri Abduhakim Hojiboyev va oliy ta’lim vaziri Inom Majidov 7-dekabr kuni imzolagan qo‘shma qaror bilan OTM talabalari va xodimlari o‘rtasida koronavirus profilaktikasini tashkil etish choralari belgilangan.
Unga ko‘ra, OTMlar budjetdan tashqari mablag‘lari hisobidan gidroksixloroxin va rux preparatlarini sotib olib, xodimlar va talabalarga tarqatadi. Bunda Dori-Darmon AK yagona yetkazib beruvchi etib belgilangan.
Ta’kidlanishicha, Monopoliyaga qarshi kurashish qo‘mitasi Sog‘liqni saqlash vazirligi tomonidan ishlab chiqilgan “Oliy ta’lim muassasalari talaba-yoshlari va xodimlari uchun koronavirus infeksiyasi profilaktikasi bo‘yicha yo‘riqnoma”sini o‘rganib, unda qonun buzilish holatlarini aniqlamagan.
“Maxsus komissiyaning qarori va qonunchilik talablaridan kelib chiqib, ayrim hollarda davlat buyurtmachilar tomonidan to‘g‘ridan to‘g‘ri xaridlarni amalga oshirishlari mumkin”, — deyiladi xabarda.
Qayd etilishicha, “Davlat xaridlari to‘g‘risida”gi qonunni amalga oshirish chora-tadbirlari to‘g‘risida O‘zbekiston Prezidentining qarori ilovasining (Davlat buyurtmachilari tomonidan to‘g‘ridan to‘g‘ri shartnomalar bo‘yicha xarid qilinadigan tovarlar (ishlar, xizmatlar) ro‘yxati) 13-bandida “Epidemiyaga qarshi (shu jumladan, veterinariyaga oid) preparatlar, qishloq xo‘jaligi zararkunandalariga qarshi kurashish uchun kimyoviy vositalar, shuningdek, favqulodda holatlarda vakolatli organlar tomonidan tasdiqlanadigan tabiat hodisalari, epidemiyalar, kasalliklar tarqalishining oldini olish yoki uning oqibatlarini bartaraf etish uchun boshqa zarur tovarlar (ishlar, xizmatlar)” kiritilgan.
Avvalroq maxsus komissiya bayonnomasi asosida Sog‘liqni saqlash vazirligi Dori-Darmon’dan 7,3 milliard so‘mga 1 million quti gidroksixloroxin xarid qilgandi. Mazkur dorilar koronavirusning oldini olish uchun maktab o‘qituvchilariga tarqatilgan.
Izoh (0)