Монополияга қарши курашиш қўмитаси талабаларга коронавирусга қарши дориларнинг фақат Dori-Darmon АК томонидан етказиб берилишида қонун бузилиш ҳолатини аниқламади

Ўзбекистон олий таълим муассасалари талабалар ва ходимлари учун коронавирусга қарши дориларни Dori-Darmon акциядорлик компаниясидан сотиб олиши тўғрисида хабар берилганди. Монополияга қарши курашиш қўмитаси икки вазирлик раҳбарларининг қўшма қарори юзасидан ўрганиш ишларини олиб бориб, ўз хулосасини тақдим этди.

Соғлиқни сақлаш вазири Абдуҳаким Ҳожибоев ва олий таълим вазири Ином Мажидов 7 декабрь куни имзолаган қўшма қарор билан ОТМ талабалари ва ходимлари ўртасида коронавирус профилактикасини ташкил этиш чоралари белгиланган.

Унга кўра, ОТМлар бюджетдан ташқари маблағлари ҳисобидан гидроксихлорохин ва рух препаратларини сотиб олиб, ходимлар ва талабаларга тарқатади. Бунда Dori-Darmon АК ягона етказиб берувчи этиб белгиланган.

Таъкидланишича, Монополияга қарши курашиш қўмитаси Соғлиқни сақлаш вазирлиги томонидан ишлаб чиқилган «Олий таълим муассасалари талаба-ёшлари ва ходимлари учун коронавирус инфекцияси профилактикаси бўйича йўриқнома»сини ўрганиб, унда қонун бузилиш ҳолатларини аниқламаган.

«Махсус комиссиянинг қарори ва қонунчилик талабларидан келиб чиқиб, айрим ҳолларда давлат буюртмачилар томонидан тўғридан-тўғри харидларни амалга оширишлари мумкин», — дейилади хабарда.

Қайд этилишича, «Давлат харидлари тўғрисида»ги қонунни амалга ошириш чора-тадбирлари тўғрисида Ўзбекистон Президентининг қарори иловасининг (Давлат буюртмачилари томонидан тўғридан-тўғри шартномалар бўйича харид қилинадиган товарлар (ишлар, хизматлар) рўйхати) 13-бандида «Эпидемияга қарши (шу жумладан, ветеринарияга оид) препаратлар, қишлоқ хўжалиги зараркунандаларига қарши курашиш учун кимёвий воситалар, шунингдек, фавқулодда ҳолатларда ваколатли органлар томонидан тасдиқланадиган табиат ҳодисалари, эпидемиялар, касалликлар тарқалишининг олдини олиш ёки унинг оқибатларини бартараф этиш учун бошқа зарур товарлар (ишлар, хизматлар)» киритилган.

Аввалроқ махсус комиссия баённомаси асосида Соғлиқни сақлаш вазирлиги Dori-Darmon’дан 7,3 миллиард сўмга 1 миллион қути гидроксихлорохин харид қилганди. Мазкур дорилар коронавируснинг олдини олиш учун мактаб ўқитувчиларига тарқатилган.