Жаҳон соғлиқни сақлаш ташкилоти Рождество ва Янги йил байрамлари сабаби Европада 2021 йилнинг бошида коронавируснинг янги тўлқини юзага келиши эҳтимоли юқори эканлигидан огоҳлантирди. Бу ҳақда «Интерфакс» хабар берди.
«2021 йилнинг дастлабки ҳафталари ва ойларида COVID-19 тарқалиши фаоллашишининг юқори хавфи мавжуд, агар буни муваффақиятли бартараф этишни истасак, биргаликда ишлашимиз керак», — дея маълум қилган ташкилотнинг Европа бўлинмаси.
Ташкилот томонидан қайд этилишича, «мўрт илдамлашга» эришилганига қарамасдан, коронавирус Европа минтақаси бўйлаб кенг миқёсда ва интенсив равишда тарқалишда давом этмоқда.
ЖССТ жамоатчиликни «шахсий қарорлар аҳамиятига паст баҳо бермасликка» ва байрам арафасида қўшимча шахсий хавфсизлик чораларини кўришга чақирган. Экспертлар Рождество ва Янги йилни имкон борича кўчада нишонлашни, байрамлар иштирокчиларига эса ниқоб тақиш ва ижтимоий масофани сақлашни маслаҳат бермоқда.
Бинолар ичидаги байрамларда эса инфекция тарқалишини камайтиришнинг муҳим омили меҳмонлар сонини чеклаш ва ҳавонинг яхши айланишини таъминлаш ҳисобланади.
«Ниқоб тақиш ҳамда дўстлар ва оила даврасида ижтимоий масофа сақлаш ғалати кўриниши мумкин, бироқ бу ҳар ким хавфсиз ва соғлом ҳолатда бўлиши учун сезиларли хизмат қилади», — дейилади баёнотда.
Изоҳ (0)