“Elektr, tabiiy va suyultirilgan gaz, issiqlik ta’minotidagi uzilishlar hamda benzin narxining oshgani aholining haqli e’tirozlariga sabab bo‘lmoqda” – Shavkat Mirziyoyev

O‘zbekistonda 2020-yilda o‘tgan yilga nisbatan ko‘mir, gaz, elektr energiyasi ta’minoti bo‘yicha Xalq qabulxonalariga murojaatlar keskin oshgan. Bu haqda ayni paytda O‘zbekiston Prezidenti raisligida o‘tkazilayotgan qish mavsumiga tayyorgarlikda yo‘l qo‘yilgan kamchiliklarni hal etish hamda oziq-ovqat xavfsizligini ta’minlash bo‘yicha aniq vazifalarni belgilab olishga bag‘ishlangan yig‘ilishda ta’kidlab o‘tildi, deya xabar bermoqda “Daryo” muxbiri.

“Joriy yil ob-havoning avvalgi yillarga nisbatan erta va keskin pasaygani tarmoqlar va hududlarning qish mavsumiga qay darajada tayyorligini yaqqol ko‘rsatib berdi. Shu bilan birga elektr, tabiiy va suyultirilgan gaz hamda issiqlik ta’minotida tez-tez uzilishlar aholining haqli e’tirozlariga sabab bo‘lmoqda.

Xuddi shunday, benzin narxining oshgani ham aholi o‘rtasida jiddiy muhokamalarni keltirib chiqarmoqda. Joylardagi rahbarlarning ishlari natijadorligiga ijtimoiy tarmoqlarda aholimiz xolis baho bermoqda”, – dedi Shavkat Mirziyoyev.

Avvalroq Shavkat Mirziyoyev Xorazm qishloq xo‘jaligini tanqid qilgandi.