Xalq deputatlari Andijon shahar Kengashining navbatdagi sessiyasi o‘tkazildi. Unda Andijon shahri hokimi Bahrom Haydarov 2020-yilda shaharni ijtimoiy-iqtisodiy rivojlantirish borasida amalga oshirilgan ishlar hamda 2021-yilga mo‘ljallangan ustuvor vazifalar yuzasidan hisobot berdi, deya xabar berdi “Daryo” muxbiri Umidjon Mamarasulov.
Murojaatda shahar hokimi hududda muhandislik-kommunikatsiya infratuzilmasini rivojlantirish (gaz, elektr energiyasi va issiqlik ta’minotini yaxshilash) borasida amalga oshirilgan loyihalar, jalb qilingan investitsiyalar, to‘g‘ridan-to‘g‘ri xorijiy investitsiyalar hajmi, yaratilgan ish o‘rinlari, foydalanishga topshirilgan loyihalarni ijtimoiy-iqtisodiy ko‘rsatkichlarining, jumladan budjet daromadlarining oshishiga qo‘shgan hissasi va natijadorligi haqida to‘xtalgan.
Hokim Haydarovning ma’lum qilishicha, joriy yilning yanvar-oktyabr oylari davomida sanoat mahsulotlari ishlab chiqarish hajmi 4 trillion 799 milliard so‘mni tashkil qilib, o‘tgan yilga nisbatan o‘sish sur’ati 117,4 foizga yetgan. Tashqi savdo aylanmasi esa 303 million dollar etib, o‘sish surati o‘tgan yilning mos davriga nisbatan 108,3 foizni tashkil qilgan. Shu kunga qadar 60,2 million dollarlik mahsulot eksport qilingan. Import hajmi esa 272,9 million dollarni tashkil etgan. Aholi jon boshiga to‘g‘ri keladigan import hajmi 609 dollarga yetgan.
Shahar hokimi hisoboti davomida xalq iste’mol mollari ishlab chiqarish xajmi, qurilish ishlari, chakana savdo aylanmasi, xizmat ko‘rsatish sohalarida ham o‘sish kuzatilganini qayd etgan.
“Ish joylarini tashkil etish va haq to‘lanadigan jamoat ishlariga jalb qilish orqali ishsizlik darajasi va norasmiy bandlar sonini kamaytirish bo‘yicha ham bir qator ishlar amalga oshirilmoqda. Prezidentimiz tomonidan tasdiqlab berilgan Davlat dasturiga asosan joriy yilda 6409 ta yangi ish o‘rinlarini yaratish belgilangan bo‘lsa-da, turli biznes loyihalarni amalga oshirishimiz natijasida shu kunga qadar 7401 nafar yurtdoshimiz bandligini ta’minlashga erishdik. Eng quvonarlisi ishga joylashganlarning 2506 nafarini ayollar, 1518 nafarini esa yoshlar tashkil qiladi”, — dedi Bahrom Haydarov.
Sessiyada “temir daftar”ga kiritilgan oilalar, ularni qo‘llab-quvvatlash va kambag‘allikdan chiqarish bo‘yicha ko‘rilgan choralar, “Saxovat va ko‘mak” umumxalq harakati natijalari, “ayollar” va “yoshlar daftar”larini shakllantirish bo‘yicha amalga oshirilgan ishlarga ham e’tibor qaratilgan.
“Ayni paytda shahrimizdagi mavjud 83 ta mahalladagi 70 917 ta xonadonda 441,7 ming nafar fuqaro istiqomat qilmoqda. Davlatimiz rahbari topshirig‘iga asosan ishchi guruhi tuzilib, har bir mahallaga deputatlar, shahar faollari hamda iqtisodiy kompleks xodimlari biriktirilgan. Ular bilan birgalikda xonadonma-xonadon kirib aholini qiynayotgan muammolarni o‘rganib chiqdik. Shuni alohida qayd etishimiz lozim, birgina ‘ayollar daftari’ hamda ‘yoshlar daftari’ni shakllantirish davomida o‘tkazilgan xatlov natijasiga ko‘ra, 5 ta sohaga taalluqli 23 ta yo‘nalish bo‘yicha 19 mingga yaqin muammolar borligi aniqlangan. Ularni hal etish bo‘yicha choralarni ko‘rmoqdamiz.
To‘g‘risini aytish kerak, o‘tgan yillarga nisbatan joriy yil davomida aholining muhtoj qismi bilan ko‘proq muloqotda bo‘ldik. Tan olish lozim, Prezident ‘temir daftar’, ‘ayollar’ va ‘yoshlar daftari’ni tuzish topshirig‘ini bermaganda, o‘zimiz beparvo bo‘lib yuraverardik. Shu vaqtga qadar muhtoj odamlar holidan xabar olmagan ekanmiz. Bu ham bo‘lsa bizning aybimiz. Aholining barcha qatlamini qamrab olish maqsadida tuzilgan daftarlar tufayli aholi bilan yaqindan muloqot qilish ham yo‘lga qo‘ydik. Bu ishlarni kelgusi yillarda ham tizimli yo‘lga qo‘yish niyatidamiz. Maqsadimiz xalqimiz bizdan rozi bo‘lsin”, — dedi Bahrom Haydarov.
Izoh (0)