Qashqadaryo viloyatining Qarshi tumanida sektor rahbarlari hokim Maqsuda Mustafoyeva betobligi sabab aholiga hokimsiz murojaatnoma yo‘lladi, deya xabar berdi “Daryo” muxbiri.
Ta’kidlanishicha, 15-dekabr kuni Qarshi tumanida hokim Maqsuda Mustafoyeva rahbarligida Xalq deputatlari tuman kengashining navbatdagi sessiyasi bo‘lib o‘tishi va unda hokim boshchiligidagi sektor rahbarlarining aholi hamda deputatlarga murojaatnomasi e’lon qilinishi kutilgan. Biroq sessiya boshlansa-da, hokim ko‘rinish bermagan.
Sessiyaga raislik qilgan deputat Polvon To‘liyev sessiyani ochib, hokim Maqsuda Mustafoyeva betobligi sabab sessiyaga kelolmaganini, shu sabab hokim murojaatnomasini uning birinchi o‘rinbosari Sardor Abdullayev o‘qib eshittirishini ma’lum qilgan.
Sessiya so‘ngida tuman mas’ullariga yuzlangan jurnalist va blogerlar hokim betobligi va sessiyada qatnasholmasligi tuman hokimligi axborot xizmatiga avvaldan ma’lum bo‘lganmi yoki sessiya avvalida oshkor bo‘ldimi, degan savolning javobi bilan qiziqqan.
“Sessiyaga hokim kelishi kutilgandi. Biroq dabdurustdan shunday bo‘lib qoldi. Lekin bu voqeadan tuman hokimligi axborot xizmatining xabari bor edi”, — dedi vaziyatni izohlagan hokim o‘rinbosari Sardor Abdullayev.
Hokimlik axborot xizmati rahbari Ali Ergashev esa holat avvaldan unga ma’lum bo‘lsa-da, hokim yo‘q paytda uning vakolatlarini bajarish birinchi o‘rinbosar zimmasidagi masala bo‘lgani uchun murojaatnoma e’lon qilinayotgan paytda hokim ishtirok etmasligini jamoatchilikka ma’lum qilmaganini bildirdi.
Eslatib o‘tamiz, ayni kunga qadar viloyatda Qarshi va Shahrisabz shahri, Dehqonobod, G‘uzor, Qamashi, Chiroqchi, Yakkabog‘, Nishon va Muborak tumani hokimlari boshchiligidagi sektor rahbarlari aholiga murojaatnoma yo‘llab, 2020-yilda amalga oshirilgan ishlar hisoboti hamda 2021-yilda qilinishi lozim bo‘lgan rejalar haqida ma’lumot berdi. Qarshi tumanidagi holat viloyatda hokimsiz murojaatnoma yo‘llangan birinchi holat hisoblanadi.
Izoh (0)