Farg‘ona viloyatining Marg‘ilon shahriga 2021-yilda “Jahon hunarmandlari shahri” maqomi berilishi mumkin. Shuningdek, shaharda Mirzakarim qutidor, Otabek va Kumushning ramziy uylari quriladi. Bu haqda Marg‘ilon shahri hokimi Adham Ziyovutdinov jurnalist va blogerlar bilan bo‘lgan matbuot anjumanida ma’lum qildi, deya xabar berdi “Daryo” muxbiri.
Ta’kidlanishicha, Marg‘ilondan yetishib chiqqan taniqli ijodkor va san’atkorlarning uy muzeylari ham tashkil etiladi.
“Marg‘ilonda turizmni rivojlantirish uchun katta imkoniyat bor. Avval shaharda ikkitagina mehmonxona bor edi, endi to‘qqizta bo‘ldi. Uy mehmonxonalari, xostellar qurildi. Bunga sabab esa keyingi yillarda atlas, “Buyuk ipak yo‘li” folklor festivallari o‘tkazilgani bo‘ldi. Pandemiya tufayli to‘xtab qolgan bo‘lsa ham, atlas festivalini kelasi yil beshinchi marta o‘tkazishni rejalashtirganmiz. Biz, asosan, ziyorat turizmini rivojlantirishga ahamiyat berganmiz. Nimagaki bu yil pandemiya turizm, xususan, turistlar oqimiga salbiy ta’sir qildi. Islom olamida katta obro‘ga ega bo‘lgan Burhoniddin Marg‘inoniy aynan shu yerda ta’lim olgan. U o‘qigan chillaxona hamon mavjud. O‘sha erda ‘Hidoya’ asarini yozgan. Bularga qiziqish ancha yuqori bo‘ladi”, — dedi shahar hokimi.
Aytilishicha, shaharda 41 ta madaniy meros obyekti mavjud.
“Prezident topshirig‘iga ko‘ra, vohadan vodiyga kelayotgan mehmonlar sonini tahlil qilish va sayyohlik agentliklari bilan hamkorlikda besh kunlik sayohat paketi tashkil etishni rejalashtirganmiz. Sayyohlar vohadan olib kelinib, yana qaytarib olib borib qo‘yiladi. Biz Marg‘ilonni Jahon hunarmandlari shaharlari ro‘yxatiga kiritish bo‘yicha barcha kerakli hujjatlarni topshirganmiz. Nasib qilsa, shahrimiz 2021-yilda jahon hunarmandlari shahri ro‘yxatiga kiritiladi.
Marg‘ilonda Uzunhovuz degan tarixiy joy bor. Shu yerda 50 sotix maydonda joylashgan eski mahalla bor. Har qancha ‘snos’lar va yangi qurilishlar bo‘lsa ham mana shu mahallani buzishga bermadik. Otabek va Kumushning uyini aynan shu yerdan qurishni niyat qilganmiz. Bu bo‘yicha marshrut ham tuzilgan, loysuvoqli uylardan iborat eski mahalla tashkil etishni ham maqsad qilganmiz. Afsuski, ish ko‘payib ketib, tashabbus sal to‘xtab qoldi. Ammo loyihadan voz kechganimiz yo‘q, 2021-yilda shu ishni amalga oshiramiz. Buning uchun viloyat hokimligidan ham yordam beriladi. ‘O‘tkan kunlar’ni o‘qigan odam borki, albatta, Marg‘ilonni ko‘rishni istaydi. Haqiqiy shu kinodagi jarayonni, ya’ni Kumush suv olgani hovuzga chiqqan holatini ko‘rsatib beramiz. Butun O‘zbekistondan mehmonlar keladi.
Yaqinda ‘Dunyo’ mehmonxonasi qurildi. O‘sha mehmonxonaning yonida ramziy tarzda Mirzakarim qutidorning uyini qurish ishlari boshlangan”, — degan Marg‘ilon shahar hokimi Adham Ziyovutdinov.
Ta’kidlanishicha, Marg‘ilon shahrida 1000 nafarga yaqin hunarmand faoliyat olib bormoqda. Marg‘ilon atlaslari dunyoning 167 mamlakatiga yetkaziladi. Yangi tashkil etilgan Hunarmandchilik markazida 200 dan ortiq turdagi atlas va adras to‘qish, gilamchilik, tikuvchilik, hunarmandchilik mahsulotlari ishlab chiqarish yo‘lga qo‘yilgan. Ayni paytda bu yerda 600 nafar usta ish boshlagan, ular tomonidan ikki mingga yaqin xotin-qizlar va yoshlar ishga jalb etilgan.
Hunarmandlar bozorida esa 45 nafar hunarmand faoliyati yo‘lga qo‘yilgan bo‘lib, 300 ta yangi ish o‘rni yaratilgan. 35 milliard so‘m mablag‘ sarflangan markazda 14 ta savdo do‘koni mavjud.
Izoh (0)