Prezident Shavkat Mirziyoyevning “Pochta aloqasi xizmatlarini ko‘rsatish tizimini tubdan takomillashtirish chora-tadbirlari to‘g‘risida”gi qarori qabul qilindi.
Qarorga ko‘ra, 2021-yil 1-fevralgacha onlayn savdo maydonchasini ishga tushirib, mahsulotlarni respublika bo‘yicha, ayniqsa, olis va chekka hududlarda savdoga olib chiqish, milliy operator tarmoqlaridan foydalanib, sotilgan mahsulotlarni manzillarga yetkazib berish tizimi joriy etiladi.
Shuningdek:
- 2021-yil 1-martgacha pochta aloqasining malakali mutaxassislarni jalb qilgan holda, o‘quv markazi tashkil qilinadi hamda 2021-yil yakunigacha qadar 2 000 nafar, 2022-yilda barcha xodimlarning malakasi oshiriladi;
- 2021-yil 1-aprelgacha Toshkent shahri, Qoraqalpog‘iston va viloyatlar markazlarida bittadan pochta aloqasi obyektida mijozlar nomiga kelgan pochta jo‘natmalarini olish uchun mo‘ljallangan o‘z-o‘ziga xizmat ko‘rsatuvchi avtomatlashtirilgan komplekslar (pochtamat) joriy etish bo‘yicha sinov/namunaviy loyihalar amalga oshiriladi. Ushbu xizmat 2021-yil yakunigacha yana 150 ta obyektda joriy etilishi belgilangan;
- 2021-yil 1-iyulga qadar pochta jo‘natmalarini qabul qilish, saralash va onlayn kuzatish imkonini beruvchi avtomatlashgan tizim ishga tushiriladi;
- 2021-yil 1-mayga qadar bank plastik kartalariga pochta aloqasi bo‘limlari orqali to‘liq xizmat ko‘rsatish (kartalarni mablag‘ bilan to‘ldirish, naqd pul yechish, jismoniy shaxslarni identifikatsiya qilish) tizimi joriy etiladi;
- 2021-yil 1-iyulga qadar pochta tarmoqlari orqali autsorsing asosida tijorat banklari nomidan jismoniy shaxslarga kredit berish to‘g‘risida arizalarni qabul qilish, kreditlarni so‘ndirish bo‘yicha to‘lovlarni qabul qilish, yuridik shaxslar kunlik savdo tushumini qabul qilish kabi bank xizmatlari ko‘rsatish yo‘lga qo‘yiladi;
- 2021-yil yakuniga qadar internet-do‘konlari tovarlarini saqlash va yetkazib berish xizmatlarini o‘z ichiga olgan 4 ta logistika markazi tashkil etiladi;
- 2021-yil 1-apreldan olis va chekka hududlardagi pochta aloqasi obyektlarida kamida 13 ta turdagi davlat xizmati autsorsing asosida tashkil etiladi.
Izoh (0)