АОКА ҳузурида Жамиятда коррупцияга қарши курашиш ҳақида матбуот анжумани бўлиб ўтди. Унда Ўзбекистон Ички ишлар вазирлиги вакиллари иштирок этди.
Анжуманда қатнашган журналист томонидан автомобиль олд ойналарини «тонировка» қилиш йўл-транспорт ҳодисалари кўпайишига сабаб бўлаётгани ва айнан олд ойналарни қорайтиришни тақиқлаш борасида таклиф берди.
Ички ишлар вазирлиги вакили бунга қуйидагича жавоб берди:
«Автомобиль олд ойналари фақат 50 фоиз ёруғлик ўтказувчанлиги бўйича тусини ўзгартириш рухсат берилган. Автомобильлар ойналари қорайтирилгани йўл-транспорт ҳодисаси содир этилишига сабаб бўлмайди. Ўзбекистонда айнан «тонировка» туфайли юз берган ЙТҲ рўйхатга олинмаган».
Бунга ҳуқуқшунос Хушнудбек Худойбердиев Telegram каналида қуйидагича муносабат билдириб ўтди.
«Агар ‘тонировка’ йўл ҳаракати учун ҳеч қандай хавф туғдирмаса, унда нега уни ўрнатиш пуллик? Нега жарималари рекорд даражада қиммат?
Майли, рухсатнома учун қандайдир рамзий тўлов бўлсин ҳам дейлик, лекин бу тўлов нима учун олд ва орқа ён ойналарга 11 миллион 150 минг сўм, орқа ён ойнанинг ўзига 1 миллион 115 минг сўм этиб белгиланган? Ва бу тўлов бир йил учун холос.
Бу нарх нимага асосан белгиланган? Ва бу нарх адолатли деб айта оламизми? Масалан, орқа ён ойнага ‘тонировка’ қилишни текин ёки айтайлик, 20—30 минг сўм қилиб қўйсак, жамиятга бирор зарар етадими?
Орқа ён ойнага парда ўрнатиш ҳуқуқини қўлга киритиш учун бир неча йил курашиб, судма-суд юрилганини эслайман-да, ҳеч бўлмаса шунисига ҳам шукр деб қўяман ичимда. Қонунда шундоқ ҳам бор ҳуқуқларга шунча курашдик, йўғига эришиш янада қийин-ов», — деб ёзади Хушнудбек Худойбердиев.
Аввалроқ Ўзбекистонда юк машиналари ва автобусларнинг ойналарини «тонировка» қилишга рухсат берилгани ҳамда «тонировка» учун рухсатномани онлайн шаклда олиш мумкин бўлиши ҳақида хабар берилганди.
Изоҳ (0)