Toshkent shahar Sergeli tumanida Gentra avtomashinasini olib qochib, uning ehtiyot qismlarini bozorda sotib yuborgan shaxs qo‘lga olindi, deya xabar bermoqda Tergov departamenti.
Ma’lum qilinishicha, 2020-yilning 4-dekabr kuni soat, taxminan, 13:00 larda 24 yoshli Maqsudxon M. Sergeli tumanida 28 yoshli Hakimjon Y.ning Gentra mashinasi yo‘lning chetida qarovsiz qoldirilganligidan foydalanib, o‘zganing transport vositasini talon-toroj qilish maqsadida avtomashinaning oldi o‘ng oynasini o‘zining yonida bo‘lgan temirdan ishlangan bolg‘a bilan sindirgan.
U Sergeli tumani “Olchazor” MFY Shokirariq ko‘chasida joylashgan qurilishi tugallanmagan uyning yonigacha mashinani boshqarib borib, salonda bo‘lgan pullarni, avtomobil ichida bo‘lgan uyali aloqa vositasi, bank plastik kartochkasini, haydovchiga tegishli bo‘lgan shaxsiga oid hujjatlarni o‘g‘rilik yo‘li bilan o‘zlashtirgan.
Bundan tashqari, avtomashinaning old yoritkich chiroqlarini, avtomagnitolasini, avtomashina eshiklarining ichki qoplamasini, avtomashina tablosi va qo‘riqlash tizimi pultini avtomashinadan yechib olib, Hakimjon Y.ga jami 11 950 000 so‘m miqdorida moddiy zarar yetkazib, hodisa joyidan yashiringan.
Mazkur holat yuzasidan 2020-yil 4-dekabr kuni Sergeli tuman 2-son IIB Tergov bo‘linmasi tomonidan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.
Dastlabki tergov jarayonida aniqlanishicha, Maqsudxon M. noqonuniy yo‘l bilan egallangan avtomobil jihozlarini “Farhod” avtomobil ehtiyot qismlari bozorida uchinchi shaxslarga sotib yuborgan.
Hozirda Maqsudxon M.ga nisbatan Jinoyat kodeksining 267-moddasi 2-qismi “g” bandi (transport vositasini talon-toroj qilish maqsadida o‘g‘rilik yoki talonchilik yo‘li bilan olib qochish) va 227-moddasi 2-qismi “a” (avtomototransport vositalarining davlat raqam belgilarini egallash, nobud qilish, ularga shikast yetkazish yoki ularni yashirish) bandi bilan ayb e’lon qilinib qamoqqa olish tarzidagi ehtiyot chorasi tanlangan.
Hozirda jinoyat ishi yuzasidan tergov harakatlari olib borilmoqda.
Avvalroq Oqdaryoda tanishining Lacetti’sini olib qochgan mast haydovchi beton to‘siqni buzib o‘tgani, O‘zbekiston chempioni Farg‘onada jarima maydonidan Jawa mototsiklini o‘g‘irlagani uchun sud qilingani hamda Toshkentda Spark’ni o‘g‘irlab ketib, YTHga uchragan yigit hibsga olingani haqida xabar berilgandi.
Izoh (0)