Milliy matbuot markazida 15-dekabr kuni bo‘lib o‘tgan anjumanda madaniyat vazirining birinchi o‘rinbosari Jamol Nosirov aholi soniga nisbatan madaniyat markazlari soni keskin kamayib ketganini ma’lum qildi, deya xabar bermoqda “Daryo” muxbiri.
Ma’lum qilinishicha, O‘zbekiston aholisi 12 million nafar bo‘lgan vaqtda 3 mingdan ortiq madaniyat markazimiz bo‘lgan. Bugungi kunda esa aholi soni 35 million nafarga yetgan bo‘lsa, 822 tagina madaniyat markazi saqlanib qolgan.
“Bularning soni keskin kamayib ketgan. Qolgan markazlarimizning ham ayrimlari aholi borib, dam olishiga yaroqsiz. To‘g‘ri, bu yillar davomida yig‘ilgan masala. Endi bosqichma-bosqich amalga oshirilib boriladi. Shu paytgacha qilgan ishlarimiz yetarli emas. Chunki madaniyat sohasi shunday sohaki, har kuni har soatda ish hajmi ko‘payaveradi. Biz qachondir biror-bir marraga yetdik, qiladigan ishimiz qolmadi deyishga vakolatimiz ham, huquqimiz ham yo‘q”, – dedi Jamol Nosirov.
Vazir o‘rinbosarining aytishicha, 2021-yildan madaniyat muassasalarining samaradorligini baholash bo‘yicha reyting joriy etiladi.
“Bu degani, har bir muassasamizning imkoniyatidan kelib chiqib qanday natijaga erishayotganini bilib, kuzatib turamiz. Bir xil sharoitda har xil natija bo‘lyaptimi, demak, inson faktori mavjud. Bu bilan ish samaradorligini oshirishimiz mumkin”, – dedi u.
Avvalroq Jamol Nosirov san’atkorlarga unvon berish va ularni mukofotlash, baholash maqsadida portal ishga tushirilishi haqida aytib o‘tgan edi.
Ma’lumot uchun, 2019-yilning aprel oyida tuman va shaharlarda bittadan markaziy madaniyat markazlari, qishloq va shaharlarda ham aholi soni 7 mingdan ortiq bo‘lganda madaniyat markazlari tashkil etilishi bo‘yicha hukumat qarori tasdiqlangan edi.
Izoh (0)