O‘zbekiston xalq artisti, kino va teatr aktyori Xayrulla Sa’diyev Prezident farmoni bilan “O‘zbekiston Respublikasida xizmat ko‘rsatgan yoshlar murabbiysi” faxriy unvoni bilan taqdirlandi. Bu haqda Madaniyat vazirligi matbuot xizmati xabar berdi.
Ma’lum qilinishicha, 6-dekabr kuni O‘zbekiston Madaniyat vazirligi tomonidan O‘zbekiston davlat san’at va madaniyat institutida O‘zbekiston xalq artisti Xayrulla Sa’diyevning 80 yillik yubileyi nishonlangan.
“Tadbirda xalqimizning sevimli aktyori Xayrulla Sa’diyev ‘O‘zbekiston Respublikasida xizmat ko‘rsatgan yoshlar murabbiysi’ faxriy unvoni bilan taqdirlandi”, — deyiladi xabarda.
Ma’lumot uchun, Xayrulla Sa’diyev Respublika Yosh tomoshabinlar teatrida ijodiy faoliyatini boshlagan. Teatr sahnasida “Revizor”, “Etik kiygan mushuk”, “Shum bola” kabi o‘nlab spektakllarda yodda qolarli rollarni ijro etgan. “To‘ylar muborak”, “Chinor”, “Alpomish”, “Chashma”, “O‘tov”, “Shaytanat” kabi ko‘plab badiiy filmlarda yaratgan obrazlari minglab muxlislar olqishiga sazovor bo‘lgan.
Eslatib o‘tamiz, Xayrulla Sa’diyev shu yilning 25-yanvar kuni jamoatchilik asosida O‘zbekiston Kinoarboblari ijodiy uyushmasi raisining maslahatchisi etib tayinlangan edi.
Izoh (0)