Миллий матбуот марказида 15 декабрь куни бўлиб ўтган анжуманда маданият вазирининг биринчи ўринбосари Жамол Носиров аҳоли сонига нисбатан маданият марказлари сони кескин камайиб кетганини маълум қилди, дея хабар бермоқда «Дарё» мухбири.
Маълум қилинишича, Ўзбекистон аҳолиси 12 миллион нафар бўлган вақтда 3 мингдан ортиқ маданият марказимиз бўлган. Бугунги кунда эса аҳоли сони 35 миллион нафарга етган бўлса, 822 тагина маданият маркази сақланиб қолган.
«Буларнинг сони кескин камайиб кетган. Қолган марказларимизнинг ҳам айримлари аҳоли бориб, дам олишига яроқсиз. Тўғри, бу йиллар давомида йиғилган масала. Энди босқичма-босқич амалга оширилиб борилади. Шу пайтгача қилган ишларимиз етарли эмас. Чунки маданият соҳаси шундай соҳаки, ҳар куни ҳар соатда иш ҳажми кўпаяверади. Биз қачондир бирор-бир маррага етдик, қиладиган ишимиз қолмади дейишга ваколатимиз ҳам, ҳуқуқимиз ҳам йўқ», – деди Жамол Носиров.
Вазир ўринбосарининг айтишича, 2021 йилдан маданият муассасаларининг самарадорлигини баҳолаш бўйича рейтинг жорий этилади.
«Бу дегани, ҳар бир муассасамизнинг имкониятидан келиб чиқиб қандай натижага эришаётганини билиб, кузатиб турамиз. Бир хил шароитда ҳар хил натижа бўляптими, демак, инсон фактори мавжуд. Бу билан иш самарадорлигини оширишимиз мумкин», – деди у.
Аввалроқ Жамол Носиров санъаткорларга унвон бериш ва уларни мукофотлаш, баҳолаш мақсадида портал ишга туширилиши ҳақида айтиб ўтган эди.
Маълумот учун, 2019 йилнинг апрель ойида туман ва шаҳарларда биттадан марказий маданият марказлари, қишлоқ ва шаҳарларда ҳам аҳоли сони 7 мингдан ортиқ бўлганда маданият марказлари ташкил этилиши бўйича ҳукумат қарори тасдиқланган эди.
Изоҳ (0)