Axborot va ommaviy kommunikatsiyalar agentligida 15-dekabr, seshanba kuni Ichki ishlar vazirligi mas’ullari ishtirokida “Jamiyatda korrupsiyaga qarshi kurashish, jinoyatchilikning oldini olishga qaratilgan ishlar” mavzusida matbuot anjumani bo‘lib o‘tdi. Tadbirda ichki ishlar vaziri matbuot kotibi Shohrux G‘iyosov vazirlik xodimlarini tasvirga olish va ijtimoiy tarmoqlarda tarqatish borasidagi savolga javob berdi, deb xabar qiladi “Kun.uz”.
“Biz hozir shu yo‘nalishda xodimlarimiz, jurnalistlar va fuqarolar uchun videorolik tayyorlayapmiz. Aniq qilib sizga aytaman, biz ichki ishlar organlari — davlat xizmatchisimiz. Davlat xizmatchisini xohlagan odam, xohlagan vaqtda tasvirga olishi mumkin va xohlagan platformaga ushbu videoni qo‘yishi mumkin. Bu hech qayerda taqiqlanmagan. Lekin bitta narsa mumkin emas va iltimos qilinadi: xodimlarning ishiga xalaqit berish kerak emas. Ichki ishlar organlari xodimlari, Post-patrul va yo‘l-patrul xizmati xodimlari ishiga xalaqit bermagan holda xohlagan joyingizda va xohlagancha tasvirga olishingiz mumkin”, — deydi vazirlik matbuot xizmati rahbari.
Eslatib o‘tamiz, 2020-yilning aprelida “Ma’rifat” gazetasining maxsus muxbiri, O‘zbekiston Jurnalistlari ijodiy uyushmasi Farg‘ona viloyati bo‘limi a’zosi Sharifa Madrahimova oziq-ovqat yarmarkasini suratga olgani uchun Farg‘ona viloyati Uchko‘prik tumani Ichki ishlar bo‘limida ushlab turilgan edi. Jurnalistning so‘zlariga ko‘ra, yozib olish jarayonida hokim kotibi telefonini undan tortib olishga uringan, IIBga kelganidan keyin esa qurilmadagi yozuvlar o‘chirib tashlangani ma’lum bo‘ladi.
Avvalroq ichki ishlar vaziri matbuot kotibi rahbarlarning lavozimdan olinishi to‘g‘risida tarqalayotgan xabarlarga munosabat bildirib, bloger va jurnalistlarni “arzon piar ortidan quvmaslikka” chaqirgan edi.
Izoh (0)