Energetika vazirligi nima uchun O‘zbekistondagi turli avtomobillarga yoqilg‘i quyish shoxobchalarida benzin bir narxda sotilmayotgani, import benzin mahalliydan ko‘ra arzon ekanligi to‘g‘risidagi savollarga javob berdi. Dekabr boshidan Ai-92 import benzin narxi alohida shoxobchalarda mahalliy Ai-80 bilan tenglashgan, ya’ni ikkisi ham litri uchun 5 ming so‘mdan sotilmoqda.
Vazirlik xabariga ko‘ra, bu bozorning liberallashuviga yorqin misol bo‘la oladi. Eslatib o‘tamiz, 2020-yilning bahorida davlat Ai-80 benzini narxini tartibga solishni to‘xtatgan edi. Bundan oldinroq Ai-90 benzini bilan ham shunday bo‘lgan. Shu sababli benzin bozor relslariga o‘tishi bilan arzonlashgan.
2020-yilning 1-mayidan boshlab xo‘jalik yurituvchi subyektlar, jumladan, AYoQShlar benzinni birja savdolari orqali sotib olmoqda, benzin narxlari turli avtomobillarga yoqilg‘i quyish shoxobchalarida farq qilishi mumkin, chunki bu u har bir AYoQSh tomonidan qanchaga sotib olinganiga bog‘liq.
“Shu tariqa, benzin va dizel yoqilg‘isini sotishning bozor mexanizmi neftni qayta ishlash zavodlari va AYoQShlarga sog‘lom raqobat sharoitida faoliyat yuritish imkonini beradi. Ta’kidlanganidek, hozirgi vaqtda benzin narxining oshishi yoki kamayishi ma’lum bir talab va taklifga bog‘liq. Xususan, bozor mexanizmi joriy etilganidan so‘ng, 3-mayning o‘zidayoq “O‘zbekiston Respublika tovar-xom ashyo birjasi” AJda o‘tkazilgan savdolar savdoga qo‘yilgan benzin narxi tushganini ko‘rsatgan”, — deyiladi xabarda.
Ta’kidlanishicha, birja savdolarida “O‘zbekneftgaz” AJ neft bazalari, avtomobilga yoqilg‘i quyish shoxobchalari va o‘z ehtiyoji uchun benzin sotib oluvchi yuridik shaxslar ishtirok etadi. Savdolar erkin, shaffof va barcha toifadagi xarid qiluvchilar uchun teng sharoitda o‘tkaziladi.
Eslatib o‘tamiz, 2020-yil 1-maydan boshlab Ai-80 markali avtomobil benzini va dizel yoqilg‘isi (shu jumladan, EKO markali dizel yoqilg‘isi) chakana narxlarini davlat tomonidan tartibga solish bekor qilindi. Shundan so‘ng, 1-maydan dizel yoqilg‘isi narxi 500 so‘mga pasayib, 6500 so‘m qilib belgilangan. 3-maydan boshlab esa Ai-80 benzinining narxi 500 so‘mga pasayib, bir litri 4000 so‘mdan sotila boshlagan.
Bundan tashqari, “O‘zbekneftgaz” kompaniyasining UNG brendi ostidagi avtomobillarga yonilg‘i quyish shoxobchalarida 13-apreldan boshlab Ai-91 markasidagi benzinning bir litri narxi 5800 so‘mdan 5600 so‘mgacha pasaytirilgan. Shuningdek, dizel narxi 1-martdan boshlab 7500 so‘mdan 7300 so‘mga pasaytirilgan, 3-apreldan boshlab esa dizel narxi yana 300 so‘mga arzonlashtirilgan holda sotuvga chiqarilgandi.
Izoh (0)