Ахборот ва оммавий коммуникациялар агентлигида 15 декабрь, сешанба куни Ички ишлар вазирлиги масъуллари иштирокида «Жамиятда коррупцияга қарши курашиш, жиноятчиликнинг олдини олишга қаратилган ишлар» мавзусида матбуот анжумани бўлиб ўтди. Тадбирда ички ишлар вазири матбуот котиби Шоҳрух Ғиёсов вазирлик ходимларини тасвирга олиш ва ижтимоий тармоқларда тарқатиш борасидаги саволга жавоб берди, деб хабар қилади «Kun.uz».
«Биз ҳозир шу йўналишда ходимларимиз, журналистлар ва фуқаролар учун видеоролик тайёрлаяпмиз. Аниқ қилиб сизга айтаман, биз ички ишлар органлари — давлат хизматчисимиз. Давлат хизматчисини хоҳлаган одам, хоҳлаган вақтда тасвирга олиши мумкин ва хоҳлаган платформага ушбу видеони қўйиши мумкин. Бу ҳеч қаерда тақиқланмаган. Лекин битта нарса мумкин эмас ва илтимос қилинади: ходимларнинг ишига халақит бериш керак эмас. Ички ишлар органлари ходимлари, Пост-патруль ва йўл-патруль хизмати ходимлари ишига халақит бермаган ҳолда хоҳлаган жойингизда ва хоҳлаганча тасвирга олишингиз мумкин», — дейди вазирлик матбуот хизмати раҳбари.
Эслатиб ўтамиз, 2020 йилнинг апрелида «Маърифат» газетасининг махсус мухбири, Ўзбекистон Журналистлари ижодий уюшмаси Фарғона вилояти бўлими аъзоси Шарифа Мадраҳимова озиқ-овқат ярмаркасини суратга олгани учун Фарғона вилояти Учкўприк тумани Ички ишлар бўлимида ушлаб турилган эди. Журналистнинг сўзларига кўра, ёзиб олиш жараёнида ҳоким котиби телефонини ундан тортиб олишга уринган, ИИБга келганидан кейин эса қурилмадаги ёзувлар ўчириб ташлангани маълум бўлади.
Аввалроқ ички ишлар вазири матбуот котиби раҳбарларнинг лавозимдан олиниши тўғрисида тарқалаётган хабарларга муносабат билдириб, блогер ва журналистларни «арзон пиар ортидан қувмасликка» чақирган эди.
Изоҳ (0)