“Arzon piar ortidan quvishni bas qiling”. Ichki ishlar vaziri matbuot kotibi rahbarlarning lavozimdan olinishi to‘g‘risida tarqalayotgan xabarlarga munosabat bildirdi

Ichki ishlar vaziri matbuot kotibi Shoxruh G‘iyosov asossiz ma’lumot tarqatayotgan ayrim ijtimoiy tarmoq faollarini “arzon PR” ortidan quvmaslikka chaqirdi.

Oxirgi kunlarda ayrim ijtimoiy tarmoqlarda, alohida davlat organlarining rahbarlarini lavozimida qolish yoki ketish masalalarida tekshirilmagan va asossiz ma’lumotlarni tarqatish holatlari kuzatilmoqda.

Albatta, o‘zining hurmatini bilgan har qanday ijod ahli, ommaga tarqatayotgan ma’lumotini tekshirilganligi yoki hech bo‘lmaganda xolisligi haqida qayg‘uradi, lekin shu bilan birga so‘z erkinligini “taltayishga” yoki “masxarabozlikka” aylantirishga urinayotgan fuqarolarni ham kuzatishimiz mumkin.

Shu sababli, ayrim ijtimoiy tarmoq faollaridan oddiy etika qoidalariga rioya etishlarini hamda arzon piar ortidan quvishni bas qilishlarini so‘raymiz.

Shohrux G‘iyosov, IIV axborot xizmati rahbari

So‘nggi kunlarda internetda ichki ishlar vaziri general-leytenant Po‘lat Bobojonovning lavozimdan olinishi to‘g‘ridagi gap-so‘zlar tarqaldi. Xususan, Telegram’dagi kanallardan birida yozilishicha, 7-dekabr kuni O‘zbekiston Prezidenti IIVning “Ma’rifat zali”da Konstitutsiya kuni munosabati bilan nutq so‘zlaydi va unda ichki ishlar vaziri Po‘lat Bobojonov lavozimidan olinadi.

Shuningdek, “Effekt.uz” nashri ham ushbu tadbirda ichki ishlar vaziri ishdan olinishi va boshqa qator boshqaruv elitasida kadrlar almashinuvi sodir bo‘lishi haqida yozgan.

Eslatib o‘tamiz, 2017-yilning sentabrida Po‘lat Bobojonov O‘zbekiston ichki ishlar vaziri etib tayinlangan edi. 1961-yilda tug‘ilgan Po‘lat Bobojonov 2012-yildan beri Xorazm viloyatiga hokimlik qilib kelayotgan edi. Bungacha Xorazm viloyati hokimining birinchi o‘rinbosari, Buxoro viloyati prokurori lavozimlarida ishlagan. 2006—2011-yillarda Jizzax viloyati prokurori bo‘lgan. U 2017-yilda IIV rahbari lavozimida Abdusalom Azizovni almashtirgan.