Ўзбекистон Соғлиқни сақлаш вазирлиги Янги йил тадбирлари, сайллар, байрам томошалари каби одам кўп йиғиладиган йиғинлар коронавирус тарқалиши учун шароит яратиб бериши мумкинлигидан огоҳлантирди. Вазирлик матбуот хизмати Коронавирусга қарши курашиш штаби аъзоси Эъзозбек Ризаевнинг мазкур масаладаги фикрларини тақдим этди.
Мутахассиснинг қайд этишича, мамлакатда карантин талабларининг бироз юмшатилганлиги, даволаниш кўрсаткичларини 97 фоизга етгани коронавирус устидан ғалаба қозонилганини англатмайди. Бу ҳозирча кўрсаткичлар мўътадиллашганини кўрсатади.
Вазирлик вакили байрам чиройли ва хурсандчилик билан ўтишини истаган ҳолда, уни уйда, оила даврасида, ортиқча дабдабасиз ўтказишни тавсия қилган. «Ўша куни меҳмонга бориш ёки меҳмон чақириш тавсия этилмайди», — дея маълум қилган Эъзозбек Ризаев. Шунинг учун ҳам Республика махсус комиссияси баёнотида вилоят, туман ва шаҳарлардаги байрам арчаларини очиқ осмон остида ўрнатиш тавсия этилди.
Таъкидланишича, байрам корпоратив ўтиришлари, турли хил дискотекалар уларнинг қатнашчилари саломатлигига жиддий путур етказиши мумкин. Айниқса, мактабгача таълим ташкилотлари, мактаблар ҳамда олий ўқув юртларида турли байрам тадбирлари ва кечаларини ташкил этиш ёшлар саломатлигига жиддий хавф солади.
«Алкоголь ва тамаки маҳсулотларини кўп истеъмол қилиш эса нишон аъзоларимиз ўпка, жигар ва буйракнинг шикастланишига олиб келади. Бу ҳолат эса иммун тизимимизнинг сусайиши ва касалликка чалиниши, шунингдек, касалликларни тез тарқалиб кетишига сабаб бўлиши мумкин», — деди штаб вакили.
Соғлиқни сақлаш вазирлиги дунёдаги эпидемик вазият ҳамон таҳликали бўлиб қолаётганини инобатга олиб, мутахассисларнинг тавсияларига амал қилиш ҳар ким учун муҳим эканини эслатиб ўтди.
«Энг асосийси, Жаҳон соғлиқни сақлаш ташкилотининг тавсияларини ҳамда коронавирус инфекциясига қарши курашиш борасидаги хорижий мамлакатлар ижобий тажрибасини инобатга олган ҳолда жамоат жойларида ниқобдан фойдаланишга жиддий аҳамият бериш лозим. Республика махсус комиссиясининг баёнотида кўзда тутилган Янги йил байрами тадбирларини ўтказиш бўйича тавсияларига амал қилиш ҳар биримизнинг соғлиғимиз учун ниҳоятда муҳимлигини унутмайлик», — дейилади вазирлик хабарида.
Эслатиб ўтамиз, Ўзбекистонга коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссиясининг 13 декабрь куни эълон қилинган қарорига кўра, вазирлик, идоралар, давлат улуши бўлган корхоналар ва бошқа ташкилотларига турли хил корпоратив байрам тадбирлари ташкил этиш тақиқланди. Шунингдек, ўқувчи ва талабалар иштирокида Янги йилга бағишланган байрам тадбирларини ўтказиш ҳам мумкин эмас.
Изоҳ (0)