Shaxsni kamsituvchi yolg‘on axborotni internetda tarqatganlarga ma’muriy javobgarlikni belgilash taklif etilmoqda. Amaldagi qonunga ko‘ra jinoiy javobgarlikka tortiladi
Oliy Majlis Qonunchilik palatasida O‘zbekistonning Jinoyat, Jinoyat-protsessual kodekslariga hamda Ma’muriy javobgarlik to‘g‘risidagi kodeksga o‘zgartish va qo‘shimchalar kiritish haqidagi qonun loyihasi muhokama qilindi. Bu haqda parlament matbuot xizmati xabar berdi.
Quyi palataning tashabbuskor deputatlari shaxsning qadr-qimmatini kamsituvchi, uni obro‘sizlantirishga qaratilgan yolg‘on axborotni ishonchli ma’lumot ko‘rinishida bila turib telekommunikatsiya, internet tarmoqlariga joylashtirganlik uchun ma’muriy javobgarlikni belgilashni taklif etmoqda.
Ularning asoslashicha, amaldagi qonunchilikda bu turdagi harakatni sodir etgan shaxs to‘g‘ridan to‘g‘ri jinoiy javobgarlikka tortilishi belgilangan, taklif etilayotgan loyihada esa shaxs shunday harakatlari uchun muqaddam ma’muriy javobgarlikka tortilganidan keyin 1 yil davomida takroran sodir etsagina jinoiy javobgarlikka tortilishi nazarda tutilmoqda.
Shaxsning qadr-qimmatini kamsituvchi, uni obro‘sizlantirishga olib keladigan yolg‘on axborotni tarqatish, shu jumladan, ommaviy axborot vositalari, telekommunikatsiya yoki internet tarmoqlariga joylashtirish orqali tarqatish bazaviy hisoblash miqdorining 50 baravarigacha miqdorda jarima solishga sabab bo‘lishi qayd qilinmoqda.
Avvalroq ushbu yig‘ilishda ijtimoiy tarmoqlarda zo‘ravonlikni yoki shafqatsizlikni targ‘ib qiluvchi videolarni joylashtirganlar 89 milliom so‘mgacha jarima tortish taklifi bildirilgani to‘g‘risida xabar berilgandi.
Ba’zi ma’muriy huquqbuzarliklar uchun jarima miqdori amaldagi bazaviy hisoblash miqdorining 200 baravarigacha miqdordan 450 baravarigacha miqdorda belgilanishi taklif etilayotgani deputatlar e’tiroziga sabab bo‘lgan. Xalq demokratik partiyasi deputatlari jarimalar miqdori aholining real daromadlaridan kelib chiqib belgilanishi zarurligi bo‘yicha fikr bildirgan. Takliflar asosida qonun loyihalari ma’qullangani aytilmoqda.
