Қашқадарёда бўлиб ўтган қишлоқ хўжалиги ходимлари кунида чироқчилик фермерга Nexia-3 автомобили топширилди. Бу ҳақда вилоят ҳокимлиги ахборот хизмати хабар берди.
Маълум бўлишича, Чироқчи туманида фаолият юритувчи «Жўра бобо Бойқулов» фермер хўжалиги раҳбари Холмурод Бойқулов жорий йилдаги фидокорона меҳнати учун Nexia-3 автомашинасига лойиқ кўрилди.
Автомобиль калитини фермерга вилоят ҳокими Зоир Мирзаев ва «Чироқчи кластер» МЧЖ раҳбари Ойбек Қосимов топширди.
Тадбирда сўз олган вилоят раҳбари Зоир Мирзаев якунига етаётган йилда вилоятда 808,6 минг тонна ғалла, 383,4 минг тонна пахта, 714,8 минг тонна сабзавот, 187,9 минг тонна картошка, 315,7 минг тонна полиз маҳсулотлари, 149,5 минг тоннага яқин мева, 2013 тонна пилла, 132,4 минг тонна гўшт, 523,8 минг тонна сут ва 270,9 миллион дона тухум тайёрлашга эришилганини айтиб ўтди.
Қўшимча қилинишича, вилоятда 2020 йилда жами бўлиб 19 триллион 904 миллион сўмлик қишлоқ хўжалиги маҳсулотлари етиштирилган. Ғузор туманида илк бор соя етиштирилган бўлса, Чироқчи ва Косон туманида етиштирилган 12,4 минг тонна тарвуз, қовун маҳсулотлари четга экспорт қилинган.
Эслатиб ўтамиз, аввалроқ вилоятда қишлоқ хўжалиги ходимлари куни муносабати билан кўпкари мусобақаси бўлиб ўтгани, унда вилоят раҳбари номидан ҳам совринлар қўйилгани ҳақида хабар берилганди.
Изоҳ (0)