20-oktabr kuni Kobulda O‘zbekiston delegatsiyasi ishtirokida Afg‘oniston va Osiyo taraqqiyot banki o‘rtasida 110 million dollar ajratishni nazarda tutuvchi “Surxon—Puli-Xumri” elektr uzatish liniyasi qurish loyihasini moliyalashtirish to‘g‘risida bitim imzolandi. Bu haqda Investitsiyalar va tashqi savdo vazirligi xabar berdi.
Foto: Investitsiyalar va tashqi savdo vazirligi
Mablag‘larning asosiy qismi tashkilotning o‘zbek pudratchilari tomonidan amalga oshirilishi rejalashtirilgan qurilish ishlariga yo‘naltiriladi. Yaqin kelajakda “O‘zbekiston milliy elektr tarmoqlari” AJ va “DA Afg‘oniston Breshna Shirkat” o‘rtasida ushbu EULni qurish bo‘yicha tegishli shartnoma imzolanadi.
Eslatib o‘tamiz, 2019-yilning sentabrida “Milliy elektr tarmoqlari” korxonasi Afg‘onistonning Da Afghanistan Breshna Sherkat kompaniyasi bilan 10 yillik muddatga mo‘ljallangan “Ol va to‘la” sharti asosidagi kontraktni imzolagan edi. Ushbu prinsip OTBning loyihani moliyalashtirishdagi asosiy shartlaridan biri hisoblanadi. Unga ko‘ra, agar Afg‘onistonning Surxondaryodan olayotgan elektr energiyasiga bo‘lgan ehtiyoji tugasa, mamlakat baribir shartnoma bo‘yicha to‘lash majburiyatini zimmasiga oladi.
“O‘zbekenergo” Afg‘onistonga elektr energiyasi yetkazib berishni ko‘paytirish maqsadida “Surxon—Puli-Xumri” elektr uzatish liniyasini qurishga 2018-yilda kirishgan edi. 260 kilometr uzunlikdagi liniya Afg‘onistonga elektr energiyasi yetkazib berishni 70 foizga — yiliga 6 milliard kilovatt-soatgacha ko‘paytirish imkonini beradi. Loyihani amalga oshirish muddati 2020-yil oxirigacha etib belgilangan.
