Осиё тараққиёт банки (ОТБ) Осиёнинг ривожланаётган давлатлари иқтисодий ўсиши бўйича прогнозларини бу йил -0,7 фоиздан -0,4 фоизгача яхшилади. «Gazeta.uz»нинг хабар беришича, бу борадаги маълумотлар банкнинг янги ҳисоботида келтирилган (PDF).
Мутахассислар 2021 йилда 6,8 фоиз ўсиш кузатилишини прогноз қилишда давом этаётган бўлса-да, минтақа ичида ривожланиш истиқболлари турлича бўлишини, яъни Шарқий Осиёда иқтисодиёт ўсиши ва бошқа субминтақаларда эса пасайиш кузатилиши кутилаётганини таъкидламоқда.
Марказий Осиё ЯИМининг прогнози 2020 йилда 2,1 фоиз даражасида сақланиб қолинган, аммо 2021 йил прогнози нисбатан бироз — 3,9 фоиздан 3,8 фоизгача пасайган. Минтақа мамлакатларидаги инфляция даражаси, экспертлар кутганидек, 2020 йилда 8,3 фоиздан 7,8 фоизгача ва 2021 йилда 6,6 фоиздан 6,5 фоизгача камаяди.
«Осиёдаги ривожланаётган мамлакатларнинг истиқболлари яхшиланмоқда. Хусусан, минтақанинг икки йирик иқтисодиёти бўлган ХХР ва Ҳиндистон учун ўсиш прогнозлари кўтарилди. Узоқ муддатга чўзилаётган пандемия ҳамон асосий хавф бўлиб қолмоқда, аммо вакциналар бўйича кузатилаётган сўнгги ўзгаришлар унинг таъсирини юмшатиши кутилмоқда. Ривожланаётган мамлакатларга вакциналарни хавфсиз, самарали ва ўз вақтида етказиб бериш минтақадаги иқтисодий тикланиш ва ўсишни қўллаб-қувватлаш учун жуда муҳимдир», — деб таъкидлаган банкнинг бош иқтисодчиси Ясуюки Савада.
Аввалроқ Осиё тараққиёт банки 2020 йилда Ўзбекистонда иқтисодий ўсиш 0,5 фоизгача пасайишини прогноз қилгани хабар берилган эди.
Изоҳ (0)