Toshkent viloyatining Chinoz tumanida yuk avtomobillarining og‘irligi va kengligini nazorat qiluvchi ko‘chma tarozi ishga tushirildi. Bu haqda “Daryo”ga Toshkent viloyati IIBB Yo‘l harakati xavfsizligi boshqarmasi xabar berdi.
Mazkur tarozi O‘zbekiston hududida avtomobil yo‘llari tarmog‘ini saqlash va avtomobil transportining xavfsiz harakatlanishini ta’minlash, avtomobil yo‘llarida katta hajmli va og‘ir vaznli transport vositalarining harakatlanishida vazn va hajm parametrlarini samarali nazorat qilishni tashkil etish orqali avtomobil yo‘llarining ta’mirlararo muddatlargacha buzilishining oldini olish maqsadida qabul qilingan Vazirlar Mahkamasi 2020-yil 28-maydagi “Transport vositalarining vazn va hajm parametrlarini nazorat qilishni joriy etish chora-tadbirlari to‘g‘risida”gi qarori ijrosini ta’minlash maqsadida faoliyat boshladi.
Ushbu qarorda O‘zbekistonning davlat chegaralari orqali o‘tkazish punktlarida mamlakatning avtomobil yo‘llarida xorijiy va milliy transport vositalarining vazn va hajm parametrlarini nazorat qilish tartiblari belgilangan.
Ishga tushirilgan tarozi M-39 xalqaro avtomobil yo‘lida yuk olib ketayotgan barcha turdagi yuk avtomobillarining og‘irligi O‘zbekiston Respublikasi avtomobil yo‘llari orqali harakatlanishi uchun belgilangan me’yoriy o‘lchovlarga mos kelishini nazorat qiladi.
Ta’kidlanishicha, tarozi yordamida transport vositalariga ortiqcha yuk ortilganligi yoki transport vositalarining har bir o‘qiga tushadigan ortiqcha yuk og‘irligi aniqlangan taqdirda belgilangan tartibda ma’muriy huquqbuzarlik to‘g‘risida bayonnoma tuziladi.
Toshkent viloyati YHXBning qayd etishicha, viloyatlararo yuk tashuvchi barcha yuk avtomobillari ortilgan yuk vaznini doimiy tarzda nazorat qilishi, ortiqcha yuk ortmasligi kerak. Aks holda jarimaga tortilish mumkin. Bundan tashqari, transport vositasiga ortiqcha yuk ortilganligi aniqlangan taqdirda, ortiqcha yuklar tushiriladi va transport vositasi qayta o‘lchanganidan so‘ng yo‘lga chiqariladi.
Izoh (0)