Andijonda ochilgan yangi institutda OTMga kirolmagan 375 nafar vodiylik abituriyent o‘qishni boshlaydi

Andijon viloyatida Iqtisodiyot va qurilish instituti ish boshladi, deya xabar berdi “Daryo” muxbiri Umidjon Mamarasulov.

Ma’lum bo‘lishicha, Andijon iqtisodiyot va qurilish instituti Vazirlar Mahkamasining 2020-yil 26-avgustdagi qaroriga asosan iqtisodiyot va qurilish sohasi bo‘yicha amaliy ko‘nikmalarga ega bo‘lgan, raqobatbardosh oliy ma’lumotli mutaxassislar va ilmiy-pedagogik kadrlarni tayyorlash, qayta tayyorlash va malakasini oshirish maqsadida tashkil etilgan.

Institut rektori vazifasini bajaruvchi Nozimjon To‘ychiboyevning aytishicha, qarorga asosan Andijon xizmat ko‘rsatish va servis texnikumining bino va inshootlari institutga operativ boshqaruv huquqi asosida berilgan. Texnikum binosi sentabr-noyabr oylarida 2 milliard 485 million so‘m mablag‘ hisobidan qayta ta’mirlanib jihozlangan.

“Mablag‘ Oliy va o‘rta maxsus ta’lim vazirligining Oliy ta’lim muassasalarini rivojlantirish mablag‘lari jamg‘armasi mablag‘lari hisobidan sarflandi”, — deydi institut rektori vazifasini bajaruvchi Nozimjon To‘ychiboyev.

Ma’lumot berilishicha, institutda 7 ta yo‘nalish bo‘yicha ta’lim beriladi.

“Ta’lim muassasalariga o‘qishga qabul qilish bo‘yicha davlat komissiyasi majlisi qaroriga ko‘ra, Farg‘ona vodiysida yashovchi va testlarda 56,7 yoki undan yuqori ball olgan 375 nafar abituriyent kontrakt asosida Andijon iqtisodiyot va qurilish institutiga o‘qishga qabul qilinishi ko‘rsatilgan. Ushbu qaror ijrosi bo‘yicha buyruqlar qabul qilingan. Shu kunga qadar 225 nafar talaba bilan tuzilgan shartnoma shartlari bajarilgan. Ular 7-dekabrdan boshlab o‘quv jarayonlarida ishtirok etmoqda. Talabalarga viloyatdagi OTMlardan saralab olingan 30 ga yaqin professor-o‘qituvchilar ta’lim bermoqda”, — deydi Nozimjon To‘ychiboyev.

Qo‘shimcha qilinishicha, 2021—2022-yillarda investitsiya dasturlariga asosan institut uchun 1200 o‘rinli o‘quv binosi va 400 o‘rinli talabalar turar joyini qurish rejalashtirilgan.