PSJ — “Istanbul” uchrashuvi 14-daqiqada to‘xtab qoldi. Jamoalar hakamni irqchilikda ayblab o‘yinni davom ettirishdan bosh tortdi

Yevropa Chempionlar Ligasi 6-turi doirasida o‘tgan PSJ — “Istanbul Bashakshehir” uchrashuvida noxush holat kuzatildi.

Uchrashuvning 14-daqiqasi o‘tib borayotgan bir vaqtda turk klubi yordamchi murabbiyi Pyer Vebo zaxira hakami Sebastyan Kolsesku bilan tortisha boshladi. Uchrashuv bosh hakami Ovidiu Xatsegan yordamchisidan aynan kimga qizil kartochka ko‘rsatish kerakligini so‘radi.

Vebo chetlatildi, biroq unga to‘rtinchi hakamning so‘zlari yoqmadi va Kolseskuga baqira boshladi: “Nega meni negro deyapsan?”. Vaziyatga mehmonlar hujumchisi Demba Ba ham aralashdi.

UEFA vakillaridan biri bu rumin tili bilan bog‘liq anglashilmovchilik ekanini tushuntirishga urindi. Ta’kidlanishicha, zaxira hakami “mana bu qora o‘yinchi” degan.

Tortishuvlar to‘xtamadi va o‘yinchilar maydonni tark etishni boshladi. UEFA tomonlarga to‘rtinchi hakamni VAR xodimi bilan almashtirgan holda uchrashuvni davom ettirishni taklif qildi. Biroq jamoalar Kolseskuning o‘yindan chetlatilishini talab qilgan. Yakunda uchrashuv qoldirildi.

Biroz vaqt o‘tib UEFA uchrashuv 9-dekabr kuni 14-daqiqadan boshlab davom ettirilishini ma’lum qildi. Uni boshqa hakamlar guruhi boshqarib boradi. Uchrashuv Toshkent vaqti bilan 22:55 da boshlanadi.

UEFA mazkur holat yuzasidan tartib intizom ishi ochgan.