Европа Чемпионлар Лигаси 6-тури доирасида ўтган ПСЖ — «Истанбул Башакшеҳир» учрашувида нохуш ҳолат кузатилди.
Учрашувнинг 14-дақиқаси ўтиб бораётган бир вақтда турк клуби ёрдамчи мураббийи Пьер Вебо захира ҳаками Себастьян Колсеску билан тортиша бошлади. Учрашув бош ҳаками Овидиу Хацеган ёрдамчисидан айнан кимга қизил карточка кўрсатиш кераклигини сўради.
Вебо четлатилди, бироқ унга тўртинчи ҳакамнинг сўзлари ёқмади ва Колсескуга бақира бошлади: «Нега мени негро деяпсан?». Вазиятга меҳмонлар ҳужумчиси Демба Ба ҳам аралашди.
УЕФА вакилларидан бири бу румин тили билан боғлиқ англашилмовчилик эканини тушунтиришга уринди. Таъкидланишича, захира ҳаками «мана бу қора ўйинчи» деган.
Тортишувлар тўхтамади ва ўйинчилар майдонни тарк этишни бошлади. УЕФА томонларга тўртинчи ҳакамни VAR ходими билан алмаштирган ҳолда учрашувни давом эттиришни таклиф қилди. Бироқ жамоалар Колсескунинг ўйиндан четлатилишини талаб қилган. Якунда учрашув қолдирилди.
Бироз вақт ўтиб УЕФА учрашув 9 декабрь куни 14-дақиқадан бошлаб давом эттирилишини маълум қилди. Уни бошқа ҳакамлар гуруҳи бошқариб боради. Учрашув Тошкент вақти билан 22:55 да бошланади.
УЕФА мазкур ҳолат юзасидан тартиб интизом иши очган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)