O‘zbekistonda 2020-yilning dekabr oyida rasmiylar tomonidan koronavirus infeksiyasi asoratlari oqibatida faqat bir kishining vafot etgani ma’lum qilindi — so‘nggi olti kundan beri (2-7 dekabr kunlari) birorta o‘lim holati haqida axborot berilmadi.
Mamlakatda koronavirusga doir statistikani yuritishga mas’ul Sog‘liqni saqlash vazirligi (SSV) 1-dekabr kuni bir fuqaro koronavirus infeksiyasi asoratlari oqibatida vafot etganini e’lon qilgan (fuqaro aynan qaysi kuni vafot etgani noma’lum). Bu fuqaro SSV statistikasi bo‘yicha koronavirusning O‘zbekistondagi 611-qurboni bo‘ldi (ammo ushbu 611 kishi orasida O‘zbekistonda vafot etmagan shaxs ham bor).
Sog‘liqni saqlash vazirligi ma’lumotiga ko‘ra, keyingi olti kun — 2—7-dekabr kunlari davomida O‘zbekistonda rasman koronavirus oqibatida birorta o‘lim holati qayd etilmagan. Ma’lumot uchun, 16-noyabr, 21—22-noyabr, 28—29-noyabr sanalari hisobga olinmasa, O‘zbekistonda 3-iyuldan to 1-dekabrgacha deyarli har kuni kamida bir kishining COVID-19 asoratlaridan vafot etgani rasman e’lon qilinayotgan edi.
Qayd etish joiz, so‘nggi haftalarda O‘zbekistonda koronavirus pandemiyasi bilan bog‘liq vaziyat barqarorlashdi. Shu munosabat bilan pandemiya boshida koronavirusga chalingan bemorlarni davolashga moslashtirilgan shifoxonalar o‘zining asosiy yo‘nalishiga qaytarilmoqda, hududlarda tashkil etilgan kovid-markazlar vaqtinchalik yopilmoqda. Ayni vaqtda mamlakatda koronavirusning ehtimoliy ikkinchi to‘lqiniga tayyorgarlik ham olib borilmoqda.
Mavzuga doir:
- SSV Germaniyada vafot etgan O‘ktam Barnoyevni O‘zbekistonda halok bo‘lgan koronavirus qurbonlari ro‘yxatiga qo‘shdi
- O‘zbekistonda koronavirus qurbonlari soni 600 kishiga yetdi
- O‘zbekistonda koronavirusga qarshi kurash vaqtida kasallikka chalinib, vafot etgan shifokorlarning faqat ikki nafari uchun 250 mln so‘mlik to‘lovlar o‘tkazib berilgan
Izoh (0)