Ўзбекистонда 2020 йилнинг декабрь ойида расмийлар томонидан коронавирус инфекцияси асоратлари оқибатида фақат бир кишининг вафот этгани маълум қилинди — сўнгги олти кундан бери (2-7 декабрь кунлари) бирорта ўлим ҳолати ҳақида ахборот берилмади.
Мамлакатда коронавирусга доир статистикани юритишга масъул Соғлиқни сақлаш вазирлиги (ССВ) 1 декабрь куни бир фуқаро коронавирус инфекцияси асоратлари оқибатида вафот этганини эълон қилган (фуқаро айнан қайси куни вафот этгани номаълум). Бу фуқаро ССВ статистикаси бўйича коронавируснинг Ўзбекистондаги 611-қурбони бўлди (аммо ушбу 611 киши орасида Ўзбекистонда вафот этмаган шахс ҳам бор).
Соғлиқни сақлаш вазирлиги маълумотига кўра, кейинги олти кун — 2—7 декабрь кунлари давомида Ўзбекистонда расман коронавирус оқибатида бирорта ўлим ҳолати қайд этилмаган. Маълумот учун, 16 ноябрь, 21—22 ноябрь, 28—29 ноябрь саналари ҳисобга олинмаса, Ўзбекистонда 3 июлдан то 1 декабргача деярли ҳар куни камида бир кишининг COVID-19 асоратларидан вафот этгани расман эълон қилинаётган эди.
Қайд этиш жоиз, сўнгги ҳафталарда Ўзбекистонда коронавирус пандемияси билан боғлиқ вазият барқарорлашди. Шу муносабат билан пандемия бошида коронавирусга чалинган беморларни даволашга мослаштирилган шифохоналар ўзининг асосий йўналишига қайтарилмоқда, ҳудудларда ташкил этилган ковид-марказлар вақтинчалик ёпилмоқда. Айни вақтда мамлакатда коронавируснинг эҳтимолий иккинчи тўлқинига тайёргарлик ҳам олиб борилмоқда.
Мавзуга доир:
- ССВ Германияда вафот этган Ўктам Барноевни Ўзбекистонда ҳалок бўлган коронавирус қурбонлари рўйхатига қўшди
- Ўзбекистонда коронавирус қурбонлари сони 600 кишига етди
- Ўзбекистонда коронавирусга қарши кураш вақтида касалликка чалиниб, вафот этган шифокорларнинг фақат икки нафари учун 250 млн сўмлик тўловлар ўтказиб берилган
Изоҳ (0)