O‘zbekistonda yana uchta tibbiyot muassasasi COVID-19 bemorlarini qabul qilishni to‘xtatib, odatiy ish faoliyatiga qaytdi

O‘zbekistonda koronavirus xavfining nisbatan kamaygani, kasallikka chalingan bemorlar soni sezilardi darajada qisqargani sabab infeksiyani davolash bilan shug‘ullanayotgan bir necha shifoxonalar odatiy ish rejimiga qaytmoqda.

SSV matbuot xizmatining xabar berishicha, yana uchta shifoxona: Toshkent shahar tez tibbiy yordam klinik shifoxonasi, Toshkent shahar perinatal markazi va Toshkent shahar 3-son yuqumli kasalliklar shifoxonasi o‘z yo‘nalishi bo‘yicha dastlabki tartibda faoliyatini davom ettiradi.

Ushbu shifoxonalar 2-dekabrdan boshlab koronavirusga chalingan bemorlarni qabul qilishni to‘xtatadi, kasalxonalardagi davolanish davom ettirilishi talab etiladigan bemorlar tegishliligi bo‘yicha 1 va 2-son Zangiota yuqumli kasalliklar shifoxonalariga ko‘chiriladi.

Bemorlar chiqarilgandan so‘ng muassasa o‘rnatilgan tartibda zararsizlantiriladi va epidemiyaga qarshi choralar ko‘rilib, mavjud tibbiy jihozlar konservatsiya qilinadi. Infeksiyani davolashda qo‘llanilayotgan dori vositalari zaxira sifatida saqlanadi.

Avvalroq 15-martdan buyon COVID-19 bemorlarini davolash bilan shug‘ullangan Virusologiya ilmiy tekshirish instituti klinikasi odatiy ish faoliyatiga qaytgani, Samarqandning Kattaqo‘rg‘on shahri va Urgut tumanidagi COVID markazlari yopilgani, Toshkentdagi ayrim taqsimlash markazlari yopilayotgani haqida xabar berilgan edi.