Spot nashri Toshkent bozorlarining daromadi va ularning qancha sof foyda qilishi haqida ma’lumotlarni e’lon qildi.
Ma’lum qilinishicha, oktabr oyi oxirida Prezident Shavkat Mirziyoyev 500 dan ortiq bozor va savdo majmualarini bosqichma-bosqich isloh qilishni nazarda tutuvchi farmon imzoladi.
Shuningdek, Davlat aktivlarini boshqarish agentligi matbuot xizmati davlat ulushi bo‘lgan bozorlar va savdo markazlarining moliyaviy ko‘rsatkichlari va mulkiy muammolari o‘rganilayotgani, alohida loyiha ishlab chiqilayotgani haqida xabar berdi.
Jarayonning o‘zi hali boshlanmagan va faqatgina tegishli qaror chiqarilgandan keyingina ishga tushiriladi. Bungacha loyiha muhokamaga qo‘yiladi, mutaxassislar jalb qilinadi. Bu bir necha oy yoki undan ko‘proq davom etadigan ko‘p bosqichli jarayon hisoblanadi.
Shunga qaramay, 450 dan ortiq bozorlar va savdo majmualarining moliyaviy ko‘rsatkichlari allaqachon ochiqlangan. Masalan, Sergeli avtomobil bozori yiliga 3,3 milliard so‘m sof foyda keltiradigan bo‘lib chiqdi. O‘rikzor bozori ikki yil ichida zarardan foyda olishga o‘tdi.
Mavzuga doir: Sergeli avtomobil bozori boshqa joyga ko‘chiriladi. Uning o‘rnida Car Box Service loyihasi amalga oshiriladi
Markaziy bozorlardan biri Oloy esa 150 million so‘mdan ortiq foyda keltirmaydi. Parkent bozori bundan ham kam — 2018-yilda 53,3 million va 2019-yilda 21,3 million daromad ko‘rgan. Askiya bozori esa so‘nggi ikki yil ichida yiliga 10 million so‘mdan kam foyda ko‘rmoqda.
Bu yerda shuni yodda tutish kerakki, bozorlar daromadlarining katta qismi soliq to‘lashga to‘g‘ri keladi. Masalan, umuman foydasi bo‘lmagan Chorsu kiyim-kechak bozori 2019-yilda 2,9 milliard so‘m daromad oldi, shundan 1,8 milliard so‘m soliq to‘lashga sarflandi.
Biroq nashrga ma’lumot bergan mutaxassislar poytaxt bozorlarining daromadi, shuningdek, sof foydasi ancha yuqori bo‘lishi mumkinligini ta’kidladi.
Mamlakat bo‘ylab 500 ga yaqin bozorlarning moliyaviy natijalari to‘g‘risida ko‘proq ma’lumotni bu yerda ko‘rishingiz mumkin.
Avvalroq O‘zbekistonda o‘tgan 11 oy davomida bozor va savdo komplekslarida jami 9 ta yong‘in sodir bo‘lgani haqida xabar berilgandi.
Izoh (0)