Shayxontohur prokuraturasi Navoiy ko‘chasidagi buzilgan do‘konlardan birining kompensatsiyasi to‘lanmagani sabab Toshkent hokimligini sudga berdi

Shayxontohur tuman prokuraturasi Toshkent shahar hokimligiga nisbatan sudda da’vo ochdi, deb xabar beradi “Xabar.uz”.

Ma’lumotlarga ko‘ra, fuqaro S.Nogayning poytaxtning Navoiy ko‘chasidagi savdo qatorlarida (sobiq “Yarmarka”) joylashgan do‘koni bir necha yil avval buzib tashlangan bo‘lsa-da, buning uchun hozirga qadar kompensatsiya to‘lanmagan.

Ta’kidlanishicha, Shayxontohur tuman prokuraturasi fuqaroning manfaatlarini ko‘zlab, fuqarolik ishlari bo‘yicha Uchtepa tumanlararo sudiga da’vo kiritgan. Unda buzib tashlanganligi uchun Toshkent shahar hokimligidan mulkdor foydasiga 1,2 milliard so‘m zarar undirish so‘ralmoqda.

Bosh prokuratura matbuot xizmati sudga da’vo arizasi 2020-yilning 2-dekabr kuni kiritilganini tasdiqlagan.

Eslatib o‘tamiz, 2019-yilda Toshkent shahar hokimligidan bino buzilishi natijasida yuzaga kelgan 3,2 milliard so‘m miqdoridagi qarz tadbirkor foydasiga undirib berilgandi.