Шайхонтоҳур прокуратураси Навоий кўчасидаги бузилган дўконлардан бирининг компенсацияси тўланмагани сабаб Тошкент ҳокимлигини судга берди

Шайхонтоҳур туман прокуратураси Тошкент шаҳар ҳокимлигига нисбатан судда даъво очди, деб хабар беради «Xabar.uz».

Маълумотларга кўра, фуқаро С.Ногайнинг пойтахтнинг Навоий кўчасидаги савдо қаторларида (собиқ «Ярмарка») жойлашган дўкони бир неча йил аввал бузиб ташланган бўлса-да, бунинг учун ҳозирга қадар компенсация тўланмаган.

Таъкидланишича, Шайхонтоҳур туман прокуратураси фуқаронинг манфаатларини кўзлаб, фуқаролик ишлари бўйича Учтепа туманлараро судига даъво киритган. Унда бузиб ташланганлиги учун Тошкент шаҳар ҳокимлигидан мулкдор фойдасига 1,2 миллиард сўм зарар ундириш сўралмоқда.

Бош прокуратура матбуот хизмати судга даъво аризаси 2020 йилнинг 2 декабрь куни киритилганини тасдиқлаган.

Эслатиб ўтамиз, 2019 йилда Тошкент шаҳар ҳокимлигидан бино бузилиши натижасида юзага келган 3,2 миллиард сўм миқдоридаги қарз тадбиркор фойдасига ундириб берилганди.