Rossiya hukumati koronavirusdan o‘lim statistikasini yashirmaydi. Tezkor shtab va “Rosstat” ma’lumotlaridagi farqlar turli xil hisoblash usullari bilan bog‘liq. Bu haqda Rossiya bosh vaziri o‘rinbosari Tatyana Golikova ma’lum qildi, deb yozmoqda Meduza.
“Bahorda ham, hozirda ham Rossiya hududida faoliyat yuritayotgan ba’zi hurmatli xorijiy ommaviy axborot vositalari Rossiyada qayd etilayotgan o‘lim statistikasi ishonchsiz deb da’vo qilmoqda. Aytmoqchimanki, tezkor shtab ma’lumotlari ham, ‘Rosstat’ ma’lumotlari ham ishonchli”, — deya ma’lum qilgan Golikova.
Golikovaning so‘zlariga ko‘ra, shtabning kunlik statistik ma’lumotlariga faqat ilgari PZR testi natijasi ijobiy chiqqan odamlarning o‘limi kiritiladi. “Rosstat” statistikasiga koronavirus o‘limning asosiy yoki qo‘shimcha sababi sifatida aniqlangan barcha holatlar kiritiladi.
Tezkor shtabning kunlik ma’lumotlari “Rosstat”ning ancha keyin e’lon qilinadigan statistikasidan deyarli uch marta farq qiladi. Shunday qilib, 1-oktabrgacha tezkor shtab ma’lumotlariga ko‘ra, koronavirusdan 20,7 ming kishi, “Rosstat” ma’lumotlariga ko‘ra — 55,6 ming kishi vafot etgan.
Ortiqcha o‘lim ma’lumotlari asosida tuzilgan koronavirusdan o‘lganlar soni bo‘yicha mustaqil hisob-kitoblar hatto “Rosstat” ma’lumotlaridan ham sezilarli darajada farq qiladi. 1-oktabrga qadar Rossiyada ortiqcha o‘lim 106 ming kishini tashkil etdi. Ushbu o‘limlarning taxminan 80 foizi to‘g‘ridan to‘g‘ri koronavirus bilan bog‘liq bo‘lishi mumkin.
Avvalroq Rossiyada pandemiya boshlanganidan buyon ortiqcha o‘lim holati 120 ming kishini tashkil etgani, bu tezkor shtabning COVID-19 borasidagi ma’lumotlaridan to‘rt barobarga ko‘p ekanligi haqida xabar berilgandi.
Izoh (0)