Rossiyaning koronavirusga qarshi kurashish tezkor shtabi tomonidan taqdim etilgan rasmiy statistika ortiqcha o‘lim holati ko‘rsatkichlaridan bir necha barobarga farq qilmoqda, deb xabar beradi Meduza.
Foto: “TASS”
“Mediazona”ning yozishicha, 2020-yilning aprelidan oktabriga qadar Rossiyada so‘nggi besh yil ichidagi ushbu davrga nisbatan 120 ming nafarga ko‘proq odam vafot etgan. Tezkor shtab esa bu vaqt oralig‘ida 28,2 ming kishi vafot etganini ma’lum qilgan.
Apreldan sentabrga qadar — “Rosstat”ning mazkur oylar bo‘yicha to‘liq ma’lumotlarida — mamlakatdagi ortiqcha o‘lim holati 106 ming kishini tashkil etgan. “Rosstat”ning o‘zi o‘tgan davr mobaynida koronavirusdan 55,6 ming odam vafot etganini hisoblagan; tezkor shtab esa 20,7 mingta o‘lim holati haqida xabar bergan.
Demograf Aleksey Rashkaning so‘zlariga ko‘ra, ortiqcha o‘lim holatining barchasi ham koronavirus sabab yuzaga kelmagan — ko‘pchiligi sog‘liqni saqlash tizimida yuklamaning ortib ketganiga bog‘liq: “Tezkor xizmatlar band — kimdadir infarkt, yana boshqasida nimadir. Rejali operatsiyalar qoldirilmoqda”.
Ta’kidlanishicha, turli mintaqalar pandemiyaga bog‘liq o‘lim holatlarini turlicha tan olmoqda. Masalan, Tiva, Komi, Sankt-Peterburg, Moskva, Moskva va Magadan viloyatlari ortiqcha o‘limlarning deyarli barchasini koronavirusga bog‘lamoqda. Checheniston, Tatariston, Boshqirdiston, Lipetsk va Leningrad viloyatlari aksincha, ortiqcha o‘lim rasman hech qanday izohlanmagan.
Epidemiya vaqtida eng og‘ir oy iyulda sodir bo‘lgan — bu vaqt Rossiyada o‘lim holati 21 foizga oshgan. Rossiyaning 23 mintaqasidagi mavjud ma’lumotlarga ko‘ra, o‘lim holati 32 foizga oshgan.
Jons Hopkins ma’lumotlariga ko‘ra, Rossiya koronavirus qayd etilganlar soni bo‘yicha dunyoda AQSh, Hindiston, Braziliya va Fransiyadan keyin beshinchi o‘rinda. Ayni paytda koronavirusga chalinganlar soni dunyoda 58 milliondan oshgan.
